Weng u Lamphang ia ki jingkynnoh u Mukul pyrshah ia u CM Conrad na ka mat iatai ka iingdorbar

Syllad | The Rising MeghalayaSeptember 20, 2023

U Lamphang ka iingdorbar  Thomas A Sangma haka sngi Balang, u la weng noh ia ki jingkynnoh jong u Mukul Sangma pyrshah ia u CM ka jylla Conrad K Sangma halor ka jingkynnoh ba u don ka jingiadei kaba jan bad u snar nongkhaii drok na Mizoram na ka mat iatai ne proceeding jong ka iingdorbar namar ka jinglong pyrshah ia ki kyndon ain.

Haba kdew ia ki kyndon, u Thomas u la ong; “Kumta ruh ban pyntreikam ia kine ki kyndon ain Nga la weng noh ia kine ki jingkynnoh bala pynmih da u Mukul Sangma na ka mat iatai hapoh ka iingdorbar namar ki long pyrshah ia ki kyndon.”

Nalor kata haba pynkynmaw ba ka Meghalaya Legislative Assembly ka dei kaba la tip ha ka ri baroh kawei halor ka jinglong discipline ne ka jingiaid beit ha ka jingpynlong dorbar, u Lamphang u la ong; “Kumta ym dei ban shimbynta ha ki jingkynnoh khlem ki sakhi satar kiba biang.”

Kane ka jingpynpaw jong u Lamphang ka la wan long ruh hadien ba u Symbud Myntri Rangbah ka jylla uba dei ruh u in-charge parliamentary affairs u Bah Prestone Tynsong u la kyrpad na ka bynta ban weng noh ia kine ki jingkynnoh jong u Mukul pyrshah ia u CM ka jylla, kata da kaba kyntu ruh ia une u dkhot napoh Songak ba un kiar ban pynshongnia lyngba ki dur ki dar.

U Mukul Sangma haba pynpaw halor katei ka jingkren u la ong ba u Dy. CM ula sngewthuh bakla halor ka jingmut jong kane. “U briew uba ka kyrteng jong u ka la mih ha ki national media u dei u briew uba la shah kynnoh ym uba la shah rai pynrem.Ngam shym la kynnoh halor kino kino ki kam bymman kiba la leh kumba la pynpaw ha ka dur. Nga sngew ba ka long kaba donkam ban long kham husiar haba ngi don ha ka kam bad ka bor ba la pynkup katkum ki riti synshar khadar,’u la ong.

Nalor kata u la ong ruh; “Nga la pynpaw ha ka jingkren jong nga ba nga ai jingmut ia u CM ka jylla na ka bynta ban kiar ialade na ka jingdon jingiadei bad kiba kum kine ki briew ia kiba ym lah satia ban tip ki dei kiei. Ka shong ha u CM ban buh ia ki ha ka jinghusiar, kane ka dei kaba nga ong. Hynrei mynta balei ba Sorkar ka khuslai bad lynga na ka bynta ban iada ia ka” ong shuh shuh u Mukul Sangma.

Haba pynpaw ka jingsngewkhia ba la wanrah ia ka kyrteng jong u ha kane ka jingiatai ka bym da donkam, na ka liang u CM ka jylla u la kyntu ia une u nongialam ka AITC ba un wanrah ia ki sakhi satar kiba biang.