Wer ka BJP ia kiba kwah ieng kyrtong ha kane ka elekshon MDC na KHADC bad JHADC

Syllad | The Rising MeghalayaDecember 12, 2024

Ka Bharatiya Janata Party (BJP) Meghalaya ka la kyntu ia kino kino kiba kwah ban long ki kyrtong na ka bynta ban mih iakhun ha kane ka elekshon ka ban wan sha ka KHADC bad JHADC ba kin phah ia ki aplikeshon sha ki president ki District hapoh ka 30 tarik Nohprah 2024.

Lyngba ka jingpynbna ka party ka la ong ba ia ka thup kyrteng ba khatduh jong ki kyrtong yn sa phah sha ka State Election Commission ha ka 5 tarik Kyllalyngkot, 2025.

“Lyngba kine ki elekshon, ka BJP ka kyrmen ban ioh ia ka kyrdan ha kaba ka party kan lah ban leh ei ei halor ka amendment kaba la sahteng la slem jong ka 6th Schedule, ha ka rukom ka ban pynmyntoi ia ka rukom pyniaid ia ki bor synshar hapoh ka Jylla,” ong u kyrwoh.

“Lada kan jop kham bun ki seat, ka BJP kan tynruh na ka bynta ban ioh ia ka Direct Funding na ka bynta ban pyniaid ia ki kam synshar shnong synshar thaw. Ka dei ka sienjam ka ban pynkup bor ia ki Rangbah Shnong bad ki Dorbar Shnong hapoh Rilum Khasi bad Jaintia, bad ka ban pynthikna halor ka jingpyniaid beit iaid ryntih ia ki kam pynroi bad ka jingpyntreikam ia kiba bun ki skhim ka Sorkar Pdeng kiba la pynwandur ban kyntiew ia ka jinglong jingman jong ki briew ha baroh ki kyrdan,” bynrap u kyrwoh.

Kumta ruh ka BJP Meghalaya ka la ong ba ka phaikhmat ban pyndonkam ia ki Autonomous District Council kum ki rynsan ban shakri ia ki paidbah bad ban pynpoi ia ki kam pynroi ha ki tyngkong iingbriew hapoh Rilum Khasi bad Jaintia.

“Ka BJP ka sngew ba ki ADC ​​ki long kum ka nongrim kaba paka ban kyntiew ia ki riti dustur bad ki kam synshar kiba la ieng ha ka jingtynjuh jong ka por bad kiba la shakri ia ki jaidbynriew trai ri la bun spah snem. Ka por ka la dei ban pynkhlain ia ki pateng, ki jingiateh kular bad ki riti dustur ban pynurlong ia ki jingangnud jong uwei pa uwei u nongshong shnong na ka bynta ka jingim kaba roi,” ka la bynrap shuh shuh.