Wer ka FASTOM sha ka jingialang paidbah ban pynkhreh ki jingiakhih

Syllad | The Rising MeghalayaSeptember 25, 2023

Ka Federation of All School Teachers Of Meghalaya(FASTOM) kaba dei ka Seng jong ki nonghikai skul adhoc ka jylla kan pynlong ia ka general meeting jong ka ha ka 7 tarik u bnai Risaw u ban wan ha Madan New Nongstoin (Marpyrshah ka ophis E.E PWD (Roads) Nongstoin Division) ha ka por 11 baje mynstep ban pynkhreh ia ki jingiakhih.

Na ka liang u Bah Eklis G War publicity secretary ka FASTOM lyngba une u kyrwoh u pyntip ba ka jingleh ia ka registration jong ki dkhot kan sdang naduh ka por 9 baje mynstep.

Ka jingkhot pynlong ia kane ka jingialang paidbah ka long kum ka jingpynkhreh jong ka Federation na ka bynta ban pynlong da ki jingiakhih ba tyngeh nangne shakhmat lada ka sorkar ka dang iai sngap mynthi  ban pynurlong noh ia ki jingdawa ban kyntiew deficit noh ia baroh ki skul adhoc ha ka jylla Meghalaya baroh kawei.

Kumta na ka liang ka Federation ka khot ka wer sngewbha ia baroh ki nonghikai skul adhoc naduh L.P haduh Higher Secondary ban pyllait por khnang ban wan sha katei ka general meeting khnang ba ki jingkhmih lynti bad jingangnud jong ka seng kan long ka ba jop.