Wer ka HYC ban iatreilang ban tem ïa u ‘Niang Corona

Syllad | The Rising MeghalayaMarch 20, 2020

Ka Hynñiewtrep Youth Council (HYC) kala pynpaw ia ka jingsngew khia halor ka jingkiew ka jingiabit u khniang Coronavirus ha kylleng ki Ri ka pyrthei kumjuh ka India bad ban tem ia une u khniang ka HYC kala khot wer bad kyntu ia baroh ki kynhun sengbhalang, sengtreimon sngewbha bad ki kynhun niam ban iatreilang ban iakhun pyrshah ia une u khniang.

Ka HYC ka ai khublei ia ka Sorkar Jylla ba ka la shim ia ki lad ki lynti ban iada ia ka jingpur kane ka jingpang, hynrei ka HYC ka kyntu ba dei ban pynkhlain shuh shuh ban shim sa ki wei de ki lad ban iada ia ka jingpur une u khniang coronavirus.

Nyngkong eh ka HYC ka dawa na ka sorkar ba kan dei ban khang noh ia baroh  ki bar ri bad ki bar Jylla ban wan sha ka Jylla jong ngi. Ia ki briew na Jylla ba leit shabar ladei ban phah test bad lada  ki don ki dak ki shin (symptom) dei ban buh shwa ia ki ha ki jaka bym don briew (isolation).

La kyntu ruh iaki Dorbar shnong, khynhun niam na ki balang bapher  bad ki seng treimon sngewbha bad kumjuh ruh ia ki bor sorkar ban pynsngewthuh paidbah lyngba ki jingthoh da ki poster ne ki kot lyngkdop bad ki social media ne khubor paidbah kumno ban iada ialade na kane ka jingpang .

Ka HYC ka banjur ia baroh ki para Ri ban bud ryntih ia ki jingbthah ki bor sorkar bad ban nym ialeh pyrshah ban lah ban iakhun ia une u khniang ba pur sted ha kylleng ki ri ka pyrthei. Kito kiba la leit jingleit shabar ka Jylla bad sha bar ri ha kine ki sngi ba ladep sngewbha ban phah check ialade ban sngewthuh ba ka jingshimkhia jong ki kan iada ia ki bad ia kiwei.