Wer ka JSM iaki samla Pnar ban mih paidbah lada kwah Reservation Policy

Syllad | The Rising MeghalayaMay 27, 2023

Ka Jaintia Students Movement ka buh jingkylli ia ki samla pule jong ka jaidbynriew Pnar hato ki sngew donkam ia ka reservation policy kumba donkam ki samla pule Khasi.

“Lada phi ki samla pule Pnar phi sngew donkam ia ka Reservation Policy ban ioh kam ioh jam ioh bhah ba biang ha ka pule ka puthi phi dei iasnoh kti lang ha kane ka jingiakhun jong ngi,” ong u president ka JSM u LS Rymbai.

U President ka JSM u ong lada ki samla pule Pnar kiba pule ha ki higher secondary schools bad colleges kiba don Ri Lum Jaintia lada ki sngew donkam ia ka Reservation Policy ki dei mih paidbah na la ki skul bad kolej da ka mon sngewbha  ha ka 29 tarik mynta u bnai ban iashim bynta ha ka sit in demonstration ha Jowai, ba la khot pynlong daka JCCRP, ka kynhun Synrop ba kynthup ia ka JSU,JSM,JYF,EJNC bad ka Synjuk Ki Waheh Shnong Jowai lem bad Ka Synjuk Ki Waheh Shnong Ri Jaiñtia. 

Ula ong ki samla pule Class XII shaneng ki dei ban pyrkhat sani bha kan myntoi aiu ban pyndep jingpule lada ym kim ioh kam sorkar namar kumba long mynta 40% u Khasi Jaintia bad 40% u Garo.

U la byrthen ia ki MLA kiba ju kren lap lap  ba dei ban seng ki kam la jong ym dei ban ap ia ki kam sorkar namar yn seng kam aiu lada ia ki kam contract la monopolize da ki kompani shimet ki politician.

U Rymbai u la ong ba kumba long mynta ha kane ka Roster system kaba la pyntreikam naduh u snem 1972 ki samla Garo ki long kiba ioh nong katba ki samla Khasi Jaintia ki duhnong watla don 36 ngut ki MLA Khasi Jaintia.