Wer ka NPP ia ki nongialam ki seng sain pyrthei ban wan pyniasoh sha ka party

Syllad | The Rising MeghalayaDecember 6, 2024

U National General Secretary ka Seng NPP uba dei ruh u Symbud Myntri Rangbah ka Jylla, u Bah Sniawbhalang Dhar u la ong ba u la pyrshang ban khot bad wer ia ki nongialam na kiwei pat ki seng sain pyrthei ba kin wan pyniasoh noh sha ka NPP.

“Nga ruh nga la leh ia kane, kata ban khot bad wer ia kiwei pat ki nongialam ban wan pyniasoh sha ka party jong ngi,” ong une u nongialam ka NPP haba jubab ia ka jingkylli la u President ka MPCC u Bah Vincent H Pala u la kyrpad ne em ia u kum u nongialam barim ba un wan pyniasoh biang sha ka party Congress kaba la rim tam.

“Kaei kaba u Bah Pala u leh, u la trei na ka bynta la ka jong ka party. Nga ruh nga la trei na ka bynta la ka jong ka party. Kam don kano kano ka jingleh bakla halor kane.Baroh ki kwah ban pynkhlain ia la ki jong ki party. Kam don jingeh halor kata,” u la bynrap.

Kumjuh haba pynpaw ba ka NPP ka dei kaba biang tam, u Bah Sniawbhalang u la ong ba kiwei pat ki party sain pyrthei ruh kum ka Congress bad ka UDP ki lah ban ong ia kajuh ba ka party ka jong ki ka dei kaba biang tam.