Wer ka Parish Pastoral Council ia ki paid riewngeit sha ka Proseshon bah ha Laitumkhrah

Syllad | The Rising MeghalayaNovember 8, 2023

Ka Parish Pastoral Council Cathedral of Mary Help of Christians, Laitumkhrah, Shillong ka khot ka wer sngewbha ia baroh ki paid riewngeit jong ka Shillong Archdiocese, Jowai bad Nongstoin Diocese sha ka proseshon bah (Eucharistic Processin) ba ju pynlong man la ka snem ka ban long ha ka 12 tarik mynta u bnai hapoh Cathedral of Mary Help of Christians, Laitumkhrah, Shillong.

Yn sdang ia kane ka proseshon da ka jingduwai ha ka por 9:15 baje mynstep bad yn bud da ka Mass Bakhuid ha ka por 10 baje mynstep, ia kaba yn pyndep da u Most Rev. Leopoldo Girelli, uba dei u Apostolic Nuncio sha India bad  Nepal, u Most Rev. Victor Lyngdoh, Archbishop ka Shillong bad ki laingut kiwei pat ki bishop kiba dang shu shah ordained kiba kynthup ia u Most Rev. Wilbert Marwein, Bishop ka Nongstoin, Most Rev. Ferdinand Dkhar, Bishop ka Jowai bad u Most Rev. Joachim Walder, Auxiliary Bishop ka Aizawl.

Ha ka por mynsngi yn sdang ia ka jingiaid proseshon ha ka por 1:30 nohphai sngi na Calvary bad yn iaid ter ter lyngba ka surok Dhankheti -Shillong Jowai -Laitumkhrah Main Road -Don Bosco square bad wanphai biang sha Calvary.

Ha kaba iadei bad kane na ka liang u BahBarnabas Nongbah General Secretary ka

Parish Pastoral Council u la pyntip ba ka la don ka jingpynkhreh ha kaba iadei bad ki jaka pynieng kali, kata hapoh Madan Iew Rynghep, St. Edmund’s college, MIIT Brookdene, St. Margareth’s convent, St. Mary’s Convent, St. Anthony’s H S School Mini-Stadium, Christ King College, Don Bosco Technical School, Parking lot ka Loreto School (Hopkinson Road) bad ha madan Malki.

Kiwei pat ki kali ki lah ruh ban pynieng shiliang ka surok ha Barik point kaba lam shapoh Pine mount School bad Seventh Set school, Lower Lachumiere napoh Horse Shoe building sha DIPR, Treasury Office, marpyrshah ka Additional Secretariat sha Barik point, ha lyndet ka Governor house, hakhamt ka Don Bosco Hall (Hopkinson Road), Jacob’s ladder, Boyce’s Road – Shillong College -Bajoria School bad kiwei.

Ha kaba iadei bad kane la pynkhreh ruh ia ki traffic volunteer ha baroh ki jaka pynieng kali bad la kyntu ruh ia baroh ki trai kali ba kin ai ka jingiatreilang khnang ban lah ban pynieng ia ki kali ha ka rukom kaba iaid beit bad ban pynsuk ha ka leit ka wan. Kito kiba pynieng harud surok la kyrpad ba kin pynieng ha kajuh ka lain khnang ban khanglad ia ka jingpynieng ha ki jaka kiba lah ban kteh ia ka leit ka wan jong ki kali.

Na ka bynta katei ka sngi ha ryngkat ka jingpynbeit ryngkat bad ki bor sorkar ba dei khmih la shim ia ka rai ba baroh ka shilynter ka surok na Dhankheti-Shillong Jowai Road-Laitumkhrah main Road-Don Bosco square – Calvary la khang pyrshah ban ieng kali na ‘No parking zone’ ha katei ka sngi.

Yn khang ia ka leit ka wan jong ki kali na ka surok Dhankheti-Don Bosco square naduh ka por 8.45 mynstep tad haduh ban da dep ka jingiaid proseshon.Kan ym don ka jingkhang ia baroh ki kali ba kin iaid lyngba ka surok Shillong-Jowai Road ha Barik Point bad Fire Brigade naduh ka por 12.00 baje mynsngi haduh 3.30 janmiet ( tad haduh ba ka jingiaid proseshon kan jam lyngba na Fire Brigade point).

Nalor kata la khang pyrshah ruh ban buh ia ki jingdie ha katei ka sngi ha lynter ka lynti iaid proseshon, kata lyngba ka surok Dhankheti – Shillong Jowai Road- Laitumkhrah Main Road bad Don Bosco Square.Ha kajuh ka por la kyntu ruh ia baroh ki paidbah ba kin pynneh ia ka jingkhuid jingsuba da kaba bret ia ki tiar kiba kila dep pyndonkam hapoh ki kriah ne ki dustbin ba la pynkhreh ha baroh ki jaka pynieng kali.La kyntu ruh ban kiar na kaba iaknieh shim pass bad ruh ban bud ryntih ia ki jingbthah da ki volunteer kiba pyniaid ia ki kali.