Wer ka seng kur Phawa Siangshai ia ki para kur ba iaid kam awria ban wan shakhmat ban iasyllok

Syllad | The Rising MeghalayaMarch 16, 2021

Ka Seng Kur Phawa Siangshai ka dap da ka jingsngewkhia halor ka jingmih ka khubor ba don kata ka association jong ki briew kiba trei ia ka kam khaii met ha kane ka jylla kaba long da shisha ka jingdie tad dor ia ka  burom ka ijot jong ka jaitbynriew Khasi ha khmat ka pyrthei.

Ka Seng Kur Phawa Siangshai ka shim ia kane ka jingkitkhlieh ban pynbha katba ka lah ha la ka bor da kaba ka khot bad wer ia la ki parakur kiba ioh lehse ki don kiba la ngop ha kum kane ka jait kam jakhlia ne kiba la pyniasnoh ialade bad ka RAM ba kin mih noh shinsyndon bad wan shakhmat dalade ban ia syllok bad ki nongialam ka jong ka kur khnang ban lah ban iarap ia ki.

“Lada kim kohnguh lane pyneh haba la khot ia ki da ka lynti kaba jai jai ka Kur kam banse khot hajir ia ki ha khmat ka Executive Committee jong ka kur lada lap ba ki don kyrteng ne don kti bad kane ka kam. Ka Sengkur ka shim ruh ia kane ka jingkitkhlieh ban iada bad weng katba lah ia ki kam sniew kiba kum kine bad da ka mynsiem kaba sngewrit ka kyrpad jur ia la ki kur ba kin ai ka kti kamon ka kti kadiang  khnang ban lah ban rat dyngkhong ia baroh ki jingsniew kiba ktah mationg ia ka imlang ka sahlang baroh,” la ong u ma Helping Phawa.

Ka Kur Phawa Siangshai kala ong ruh ba jingiatreilang ka jong phi ki paradoh parasnam kan long kaba kordor tam na bynta ka lawei ym tang jong ka Kur Phawa Siangshai, hynrei jong ki pateng pakit ka jaitbynriew hi baroh kawei.