Wer ki riewngeit Niamtre ban iakhun pyrshah ia ka bamsap shwa ban dier ka por

Syllad | The Rising MeghalayaJuly 4, 2024

Shibynta jong ka lehniam Behdeinkhlam kaba la kut noh ha ka 3 tarik Naitung, na ka liang ki riewngeit ka Niamtre na Umshangiar, Jowai lyngba ki rot kiba ki la shna kyrpang ki khot ki wer ia ki nongshong shnong ka jylla ban kut jingmut na ka bynta ban iakhun pyrshah ia ka bamsap shwa ban dier ka por.

Ia kine ki rot la pynngam noh ha ka pung Aitnar ha kane ka sngi kut jong ka tamasa Behdienkhlam ba saw sngi kynthih ha Chiliangraij,Jowai ha ryngkat ka jingsakhi jong ki phew hajar ngut ki paidbah na kylleng ka ri Khasi Jaintia bad na kiwei pat ki bynta jong ka ri bad shabar kumjuh.

Nalor kata kine ki rot ki rah ruh ia ka khubor na ka bynta ka Sorkar Meghalaya kaba ong, “Meghalaya Sustainable Development” kam dei tang ka thong hynrei ka jingkular na ka bynta ka lawei ka ban wan.

Katba ia ka khubor kaba iadei bad ka jingdonkam ban tyngkai ia ka um la pynphriang lyngba ka shnong Tympang Iawmusiang, Jowai lyngba ki rot kaba ong, “Destroy Water You Destroy Life” bad  “Be Part of the Solution Not Part of the Pollution.”

Kumjuh ka shnng Loomiongkjam lyngba ki rot ki kyntu ia ki briew ba kin kamai lyngba ka lynti jong ka hok bad ban sangeh shisyndon ia ki jingleh kiba beain namar kin ym lah ban rah ia ka spah jng ki hadien ba la khlad na kane ka pyrthei.

Ha kawei pat ka bynta, ki dkhot jong ka Tyllilang Niamtre Ladthadlaboh ki la bam halor ka jingdonkam ban pynneh pynsah ia ka mei mariang, katba ki riewngeit na ka Seng Khasi Shillong ki la khot na ka bynta ka jingiatylli.

Baroh ki don haduh 12 tylli ki rot ba la shna pynwandur ia kiba la wanrah da ki nongshong shnong bad ki kynhun seng ia kiba la pynngam noh hapoh ka pung ktieh ba kyntang ha Aitnar.