Wer pynrung kyrteng ia kiba la dap 18 snem haka Electoral Roll ha Amlarem Constituency

Syllad | The Rising MeghalayaOctober 27, 2021

Ka office jong ka Electoral Registration Officer, 7-Amlarem (ST) Assembly Constituency, ka la pyntip paidbah ba ka Election Commission jong ka ri India, kala hukum ban pynbiang ia ka Draft Photo Electoral Roll jong ka 7-Amlarem Assembly Constituency ha ka Sub-Division kat kum ka tarik 01-01-2022. Halor kane kito ki nongshong Shnong kiba la dap 18 snem ka rta katkum katei ka Tarik bad kumjuh ki bym pat don kyrteng ha ka Draft Photo Roll ki lah ban pynrung kyrteng ialade ha ki Polling Station ba ki shong ki sah. Kumjuh ruh ia kito ki ba la iap ne phet Shnong noh ia ka kyrteng jong ki na ka Photo Electoral Roll, ia ki jingbakla ruh yn pynbeit ha kane ka por.

Ha ka jingiadei bad kane, ia ka Draft Photo Rolls yn pynmih ha ka 01-11-2021 ha ka ophis jong ka Electoral Registration Officer, Office jong ka Sub-Divisional Officer (Election) Amlarem Sub-Division bad lyngba ki Booth Level Officers (BLOs) ha ki Polling Station. Ia ki jingtyrwa bad jingdawa ne jingujor kyrteng yn pdiang naduh ka 01-11-2021 haduh ka 30-11-2021.

Ka office jong ka Electoral Registration Officer, 7-Amlarem (ST) Assembly Constituency, ka pyntip paidbah ba ki briew sorkar (Booth Level Officers) kin wan ha ki Polling Station ban trei na ka bynta kine ki kam naduh ka 01-11-2021 haduh ka 30-11-2021. Kumta la kyrpad ia ki nong shong shnong ban leh ia kine harum:-

Ban ai ia ki Kyrteng jong ki Nongthep Vote kiba la iap ne kiba phet Shnong, khnang ba yn lah ban ot noh ia ka kyrteng jong ki ha ka Electoral Roll.

Ban ai jingiarap lem ia ki briew sorkar (BLOs), da kaba bishar sani ia ki kyrteng bad ki dur la ki ia hap ne em bad ka rta jong u/ka nongthep vote, ka iahap ne em bad ka dur khmat kaba la mih ha ka Draft Photo Electoral Rolls, khnang ba kan nym mih ka jingkulmar ia ki kyrteng bad ki dur. Lada lap ia ki ba kum kine sngewbha ban pyntip mar mar sha u Electoral Registration Officer lane sha u Booth Level Officer jong kato ka Polling Station hapoh ka shnong jong phi.

Baroh ki nongdawa ne nongthep Form ki dei ban da leit mih ha khmat u Electoral Registration Officer/Assistant Electoral Registration Officer ha ka tarik, por bad jaka ba la buh ia ki na ka bynta ban tohkit bniah. U Electoral Registration Officer/ Assistant Electoral Registration Officer ki lah ban kyntait noh shisyndon ia ki Form lada U/Ka nong aplai ki khlem leit mih da lade hi ha khmat u Electoral Registration Officer/ Assistant electoral Registration Officer ha ka tarik ba la buh.

La kyrpad ruh ban pyllait ia ka ing skul/Community Hall (Polling Station) ha kitei ki sngi na ka bynta kane ka kam. Kumjuh ruh ban iarap ia ki briew sorkar (Booth Level Officers) ha kino kino ki bynta kiba donkam ynda ki poi sha ka shnong jong phi da ka ba bud ryntih ia ki kyndon ba la pynmih daka tnat jong ka koit ka khiah kum ka jingdeng ia ki Mask, ka jingieng ia jngai iwei na iwei pa (Social distancing) kumba 6phut eiei bad ka jingsait kti da ka sabon bad ka Hand Sanitizer.

U Electoral Registration Officer/ Assistant Electoral Registration Officer ki la dep pynbeit ia ki tarik ban bishar ia ki Form 6, 7, 8, 8A bad ia ki tarik/por bad jaka, phi lah ban ioh na ki Booth Level Officer.

Kin sa don ruh ki sngi ba kyrpang (Special Campaign Dates) ha ka 13/11/2021 bad 20/11/2021 ki ba dei ki Saturday (Sngi Saitjain) ha kaba ki Booth Level Officers (BLOs) kin don baroh shi sngi ha ki Polling Stations, kumta la kyrpad ia ki nong shong shnong ban leit mih sha ki Polling Station jong phi.