Wer u DSO East Khasi ïaki skul ban iashimbynta haka Inter School Athletic Meet

Syllad | The Rising MeghalayaMarch 26, 2019

SHILLONG: Ka ophis jong u District Sports Officer (DSO), East Khasi Hills District kan pynlong ia ka lympung ialehkai kaba la tip kum ka East Khasi Hills District Level Inter School Athletic Meet 2019 naduh ka 7 tarik haduh ka 9 tarik u Jymmang 2019 ha J.N Sports Complex, Polo, Shillong.

Ka jingpynlong ia kane ka jingialehkai ka long kum shi bynta ban sei madan ia ka sap ka phong jong ki khynnah kiba hapoh 14 snem, hapoh 16 snem bad hapoh 18 snem ka rta kiba pule ha ki skul bapher bapher hapoh ka East Khasi Hills District bad ki khynnah kiba kynsai kin ioh pat ka lad ban mihkhmat ia ka District sha ka State Level Competition bad kiwei pat ki lympung ialehkai ki ban sa long shen.

Ki skul kiba kwah ban iashim bynta ki lah ban ioh ia ki entry form na ka ophis treikam u District Sports Officer, East Khasi Hills District, J.N.S Complex Polo, Shillong naduh ka sngi ba pynmih ia kane ka khubor tang ha ki por long trei. Ka jingpdiang ia ki form na ka bynta ban iashim bynta ha kane ka lympung kan long haduh ka 24 tarik u Iaiong, 2019 bad ka jingjurip ia ka rta ki khynnah kan long ha ka 30 tarik u Iaiong, 2019.

Haba iadei bad kane ka prokram, na ka liang ka ophis jong u DSO ka iawer ia baroh ki skul kiba don hapoh ka East Khasi Hills District ba kin wan ban iashim bynta ha katei ka lympung.