Wh. Kambell Chullai “U Khai – U Piar ka Ri – ka Jaitbru”

Soolangki LalooJune 16, 2024

Kdar ha ki Khatar snem na chwa ym ye u mylliñ lyndet wa ynne ka sngi 16 tarik Nai Ynru man ko ka sngi wow sah kynmoo sah khanatang, ka sngi kawa u lyoh doom I sniawsih sniawdiaw ya ka yung ka sem, ya ki khon ka Raij Jwai wa kamjooh ya waroh ki khon ka Ri Le phaw Syiem- Khatar Dolloi wa hapyrdi wa dang dawa I por ka juk wow ioh ka pyrthai u sakhi u ioo yei sap wei chemphang wa sarot kiwa man I kyrkhu wei myntoi ya ka imlang sahlang ieh syndet u Waheh Kambell Chullai yeini I pyrthai chongwasa.

U Waheh Kambell Chullai toh sakhiat U Khai – U Piar ka Ri – ka Jaitbru, uwa da e sap kyrpang u Trekirot heiwa I sap wei chemphang iong o wow pynmih pyrthai ya ka Khnap thangbru (Eco- friendly Crematorium) man I kyrkhu wei burom wakhroo ya ka Ri wa ka jaitbru wei kawa e myntoi leh liang wanang ya ki Bru wa pynemkam ya ka kamjooh yada ko leh yei man I long ka Rymaw dei wa lait nei pom I thyllem ya ki dieň kam wa jooh leh ha ki por wa dalai.

Pynchongnia chongnongrim yei sap wa kyrpang iong u Waheh Kambell Chullai wow pynmih pyrthai ya ka Khnap Thangbru (Eco- friendly Crematorium), ïoo sakhiat waman I kyrkhu wakhroo ya ki khon ka Ňiamtre ha kylleiñ ki chnong ki thaw heiwa da pynsuk ya kawi pa kawi ka manyung wow pyndep ya ka niam ka rukom, ka thang ka rin man da em I hap I oor, I pat rangbah rangsan iong ki khon ka Ňiamtre.

Ha lyndet ini iyi iyi waroh I kyrkhu wa daioh, man ka khubor wa sniawsuk u tip wa ha uni u snem ka Seiňraij Ňiamtre Shillong kam ka dak I Sniawngooh Makhane ya ki kam wa Sarot u Ma Kambell Chullai iwa man I burom wei kyrkhu wakhroo ya ka ri wa ka jaitbru, ynne ka sngi 16tarik Naiynru 2024 da pynsah kynmoo ko ya ka Lyngkhooh snem Iap wa 12 u Wh. Kambell dei wa booh iow Motdur Sah kynmoo hei thaw wa em ka Khnap Thangbru (Eco-Friendly Crematorium) ka Seiňraij Ňiamtre Shillong wa em ha Jaiaw, East Khasi Hills District.

Kamwa pynkynmoo iow Waheh Kambell Chullai da kha ha ka 8tarik Thohlakhmi (February) 1939 wei da ieh u yeini I pyrthai chongwasa ha ka 16tarik Naiynru (June) 2012, hei lai luti heini ha sla khyndaw pyrthai kam u khynnah, u khynroo, u waheh daleh u chiboon ki kam kiwa mih nei sap I chemphang wa sarot iong-o kam I chna ya ka Camera Chondur, I chna ya ki rot wa phylla hei por Behdeinkhlam, I pynmih pyrthai ya ka Khnap thangbru (Eco-friendly Crematorium) wa kiwi kiwi.

Wh. Kambell Chullai Im I pyrtuid I nam ïongme
Chihajar Ngooh wei Sñiaw Makhane.