WJDSA: Iakhaid ka Niaw Wasa bad ka Mukhla Raij haka Super Division; Jop bun kol Evergreen Mukhla haka First Div.

Syllad | The Rising MeghalayaOctober 19, 2023

Ka Niaw Wasa Utd kala iakhaid bad ka Mukhla Raij mar 1-1 haka Super Division Football kaba pyniaid da ka West Jaintia District Sports Association (WJDSA) kaba long ha madan Kiang Nangbah ha sngi Palei.

Katba ka Evergreen Mukhla kala jop da 5-1 pyrshah iaka Moosyiem Shangpung haka jingialehkai First Division Football Tournament.

U Nidaioh I Dhar ula kylla long u namtam ha kane ka jingkhur namjop ka Evergreen Mukhla ha kaba ula khyrwit da ka hattrick kaba nyngkong jong kane ka aiom ialehkai.

U Nidaioh ula thep ia kine ki kol haka minit kaba 8′, 20′ bad 65′. Ar kol la thep da Pynioladmiki Ryngkhlem 9′ bad u Dauni Suna 76′. Shikol ka Moosyiem Shangpung la thep da u Kenny Langbang 43′.

Haba phai sha ka Super Division ka Mukhla Raij kala ioh shuwa ban pynkhih iaka jar lyngba u Timmy Ryngkhlem 9′ bad ka Niaw Wasa kala ioh ban pynphai biang ban tan kylla iaka jingialehkai sha kaba iakhaid lyngba u Pynshai Lathong 23′.

Lashai ka sngi Thohdieng ka jingialehkai Super Division kan long hapdeng ka Sailung Ialong pyrshah iaka Ladthadlaboh haka por 2 Pm. Haka First Division pat, ka Sohmynting kan iakhun pyrshah iaka Wahiajer haka por 12 baje mynsngi.