WJDSA: Jam ka U-17 Independence Day Cup sha ka semifinal, ka Third Division sha ka wat kaba ar

Syllad | The Rising MeghalayaAugust 11, 2023

Ka Independence Day Cup Under-17 Football Tournament kala jam noh sha ka semifinal bad la buh tarik ba kan long haka 12 tarik Nailar ha Kiang Nangbah Stadium. Katba ka Third Division lashai ka dei ka jingiakhun kaba khatduh jong ka wat kaba nyngkong.

Baroh ar tylli kine ki jingialehkai football dei kiba pyniaid da ka West Jaintia District Sports Association (WJDSA).

Ki kynhun kiba la buh jaka haka semifinal ki long ka Mukhla Raij pyrshah Mulang Ialong bad ka Dulong pyrshah iaka Demthring. Baroh ar tylli kine ki jingialehkai semifinal kin long haka 12 tarik Nailar haka por 1PM bad 3:30 PM. Bad ka Final kan long haka sngi rakhe iaka Independence Day.

Haba phai sha ka jingiakhun quarter final kaba khatduh haka sngi Palei, ka Demthring kala jop da 2-0 iaka Evergreen Mukhla. Ka kol kaba la thep da u Olanroi Suting haka minit kaba 4 bad 27 kala biang pura iaka Demthring ban jop bad buh jaka haka semifinal.

Haba phai sha ka Third Division Football Tournament, ka Madankynsaw Mawkyndeng kala pynliem da 4-0 iaka Tympang. Ia kine ki kol la thep mar shikol da u Iowmainki Lamare 31’, Leonard Passah 38’, Two pillar Tang 52’ bad u Dame chan I Sayoo 54’.

Haka jingiakhun kaba bud, ka Mookaswan Dongwah kala jop da 1-0 iaka FAM da 1-0. Ia kane ka kol la thep da u Ion Phawa 50’.

Ki ar kol na u Niawkor Sari 24’ bad 70’+3 kala biang pura iaka Mukhla Umlangchor ba kan pynliem da 2-0 iaka Da-I-Hi SC Mynsngat .

Ka Third Division kaban jam noh artad sha ka wat kaba ar ne ka pre quarter final, mynta ka sngi Thohdieng ka dei ka jingialehkai ba khatduh jong ka wat ba nyngkong. Ka jingiakhunn kanlong hapdeng Madanthad Thadmuthlong pyrshah iaka Royal Pole Mihmyntdu bad ka Kseh Sylle Ialong pyrshah iaka Pasyih cultural ki ban long haka por 12 baje mynsngi bad 2 baje nohphaisngi.