WJDSA: Jam noh ka Under-17 sha ka Quarter Final, jop ka Iooksi bad ka Rising Sun Mukhla haka Third Div

Syllad | The Rising MeghalayaAugust 8, 2023

Ka Independence Day Cup Under-17 Football Tournament kala jam pat sha ka quarter final bad ka jingiakhun la buh ban long haka 9 bad 10 tarik Nailar. Katba ka jingiakhun Third Division kala iaid shait shait bad sa tang katto katne tylli ki jingiakhunkan jam pat sha ka wat kaba ar.

Baroh ar tylli kine ki lympung la pyniaid da ka West Jaintia District Sports Association (WJDSA) ha madan Kiang Nangbah Stadium.

Ki kynhun kiba la rung sha ka quarter final haka Under-17 kilong ka Ladthadlaboh kan aireng pyrshah iaka Mulang Ialong, 7 wasa pyrshah iaka Mukhla Raij, FAM pyrshah iaka Dulong bad ka Demthring pyrshah iaka Evergreen Mukhla.

Lai tylli ki quarter final kin long haka juh ka sngi haka 9 tarik Nailar haka por 10:30 Am, 2 Pm bad 4 PM. Katba FAM pyrshah iaka Dulong kan long haka 10 tarik por 4 Pm.

Haba phai sha ka jingiakhun pre quarter final kaba long haka sngi Nyngkong, ka Mulang Ialong kala pynliem da 2-0 Lutituber Ialong. Ia kine ki ar kol jong ka Mulang Ialong la thep da u Chalet Phawa 53’  bad u S. Pale 57’.

Ka kol kaba la thep da u Chwami Dkhar 2’ bad u Pynshaimiki Sana 40’ kala biang pura iaka Evergreen Mukhla ban pynliem da 2-0 iaka Thadmuthlong.

Haba phai sha ka jingialehkai Third Division, ka Iooksi Youth Welfare kala jop da 3-1 iaka Moodymmai. Ia kine ki lai kol ka Iooksi la thep da u Pyrkhat Paslein 36’, u Ngaitmi Syngkon 56’ bad Pyrshang Tangliang 62’. Shikol ka Moodymmai la thep da u Tellme Passah 29’

Ka Risingsun Mukhla ka la pynliem da 5-0 iaka Mookynphad Mihmyntdu. Ia kine ki san kol la thep da u Melvin Lyngdoh 17’ & 39’, u Nathan Suna 61’, u Pynyoo Bang 69’ bad u Chembun Suna 70’.