WJDSA: Jop ka Niaw Wasa bad ka FAM haka Independence Day Cup U-17, buh jaka haka Quarter Final

Syllad | The Rising MeghalayaAugust 3, 2023

Ka Niaw Wasa bad ka FAM kila jop haka jingialehkai Independence Day Cup Under-17 Football Tournament kaba pyniaid da ka West Jaintia District Sports Association (WJDSA) kaba la jam pat sha ka pre quarter final kaba long ha madan Kiang Nangbah Stadium haka sngi Palei.

Haka sngi sdang ka pre quarter final ka Niaw Wasa kala pynliem da 2-0 iaka Khimusniang. Ia kine ki ar kol la thep da u Kerlangmi Kelphung 36′ bad u Thank You Mukhim 53′.

Ha kawei pat ka jingiakhun ka kol na u Leikirang Suiam 9′ bad u Pynsngatmiki Papang 54′ kala biang pura iaka FAM ban khur iaka jingjop pyrshah iaka Mynthong.

Da kane ka namjop ka Niaw Wasa bad FAM kila buh jaka ialade haka quarter final.

Haba phai sha ka jingiakhun Third Division, ka jingiakhun hapdeng ka FAM pyrshah iaka Pasyih Cultural kala kut da 2-2. Ka FAM kaba la shah tam da ar kol kala lah ban pyniakhaid pat ia kane ka jingiakhun lyngba ka kol u Helpme Phawa 57 bad u Hardyson Tang 69. Ar kol ka Pasyih la thep da u Shining Rymbai 42′, 43′.