WJDSA: Rung ka Madan Thadmuthlong sha ka semifinal Third Div, 22 tarik Nailar yn sdang ka 2nd Div

Syllad | The Rising MeghalayaAugust 19, 2023

Ka Madan Thadmuthlong kala jop da 4-0 iaka Mookyrdup haka jingiakhun quarter final haka Third Division Footbal Tournament kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka sngi Thohdieng.

Da kane ka namjop ka Thadmuthlong ka dei ka kynhun kaba nyngkong ban buh jaka ialade haka kyrdan semifinal. Lai tylli ki jingialehkai quarter final kin long haka sngi Saitjain.

Haka jingiakhun u Precious Tang u rangialehkai jong ka Madan Thadmuthlong ula khyrwit lai kol 42′, 59′ & 74′ bad shikol na u Manhok Suchiang 45′ kaba la biang pura iaka Thadmuthlong ban khur jingjop.

Ka jingiakhun quarter final haka sngi Saitjain kan long hapdeng ka Mukhla Umlangchor bad ka Newhill haka por 11.00 baje mynstep. Ka Pateinki Sabah bad ka Moodop Royal haka por 1.00 baje nohphai sngi. Ka Madankynsaw bad ka Da-i-hi-Mynsngat haka por 3.00 baje janmiet.

Shuh shuh ha kawei pat ka khubor ka WJDSA kala pyntip ba ka jingialehkai Second Division-6th Debo Shullai Memorial Trophy kan sdang naduh ka 22 tarik Nailar.

Ka jingialehkai kan sdang da ka jingiakhun hapdeng ka Maitchaphrang Mowtyrchiah pyrshah iaka Caroline Colony haka por 12.00 baje nohphai sngi bad Nangbah Dukhu pyrshah iaka Khliehmyngkrem haka por 2.00 baje nohphai sngi.

Ki don 16 tylli ki kynhun kiba kynthup iaka Pool A: Chilliangraij, NSA, Mooknor Thadmuthlong bad Lion.

Pool B: Shangpung Khliehmuchut, Pynthorlangtein, Panaliar bad Iawmulong Nartiang.

Pool C: Maitchaphrang Mowtyrchiah, Caroline Colony, Nangbah Dukhu bad Khliehmyngkrem.

Pool D: Chutwakhu, Dongmihsngi, Lumpariat bad West Madan Mustem.