WJDSA: Sdang ka Super Division da ka namjop Shangpung Lumiawmuchai iaka Khimusniang, jop ka Nangbah Iawmusiang haka First Div

Syllad | The Rising MeghalayaOctober 18, 2023

Ka Shangpung Lumiawmuchai kala pynliem da 3-2 pyrshah iaka Khimusiang haka sngi sdang ka Super Division Football-U Kiang Nangbah Memorial Trophy kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka sngi Balang

Ka Shangpung Lumiawmuchai kala tam shakhmat lai kol tang hapoh 13 minit bala iaid ka jingialehkai. Ia kine ki lai kol, ar kol la thep da u Elizer Suiam 5′, 14′ ba shikol da u Chillang Langstang 13′.

Dei hadien ba shah tam haduh lai kol, ka Khimusniang kala iakhun tyngeh ban ioh pynphai, hynrei ka Shangpung ruh kala iakhun da kata ka sur ialehkai ban iada iaka kut jong ka. Dei haka kyllamiet, ka Khimusniang kala ioh ban pynphai ar kol lyngba u Darimitre Syih 50′ & 87′ hadien ka jingtynjuh bor bah iaka kut ialehkai ka Shangpung.

Haba phai sha ka jingialehkai First Division, ka Nangbah Iawmusiang ka la jop da 2-0 iaka Mookyndur da 2-0. Ia kine ki kol la thep da u u Dawanbiang Passah 79′ bad u Mebanker Shalam 83′.

Haka 19 tarik Risaw ka jingïakhun First Division kan long hapdeng ka Mukhla Evergreen pyrshah iaka Moosyiem Shangpung haka por 12.00 baje nohphai sngi. Katba ka jingïakhun Super Division kan long hapdeng ka Niaw Wasa United pyrshah iaka Mukhla Raij SC haka por 2.00 baje nohphai sngi.