WORLD PRESS FREEDOM DAY: Ka sngi rakhe ïaka Jinglaitluid Ki Lad Pathai Khubor

D R Michael BuamMay 3, 2020

“Ki lad pathai khubor kiba laitluid bad ki bym shah teh ki long ki ri-jied ka synshar paidbah.” – Oscar Auliq-Ice

Man la u snem, ha ka 3 tarik jong u bnai Jymmang, ka pyrthei baroh ka kyntiew nam bad pynkynmaw ïa ngi ïa ka jinglong tynrai bad kongsan jong ka jinglaitluid ki lad pathai khubor. Ïa kane ka sngi kyrpang “World Press Freedom Day” la pynbna da ka General Assembly ka United Nations ha u snem 1993 hadien ba ka General Conference kaba 26 jong ka UNESCO kaba la long ha u snem 1991 ka la rikomen ïa kane. Kane ka sngi kyrpang ka pynkynmaw bad kynpham ïa ki bor sorkar kylleng ka pyrthei ïa ka jingdonkam bad ka deiti jong ki ban aibor bad kyrshan ïa ki lad pathai khubor bad ïa ki nongthoh khubor kumjuh. Ka dei ruh ka sngi kaba pynkynmaw ïa ngi ki nongshongshnong ïa ki jingpynkheiñ ne ki jingpynduh ïa ka hok jong ki nonghtoh khubor bad ki lad pathai khubor kiba shait jia khah-khah ha kylleng ka pyrthei. Don ki ri ka pyrthei ha kiba ki nongthoh khubor kim ïoh laitluid ban thoh ïa ki jingjia kumba ki long bad don ki lad pathai khubor kiba shah daiñ kuna ne shah khang na ki bor sorkar.  Don ruh ki nongthoh khubor, ki editor bad ki nongpynmih khubor kiba shah lehbeiñ, shah shoh, shah set byndi ne wat shah pynïap ruh namarba ki trei hok ïa la ka kam. Kumta, kane ka sngi ba ngi rakhe mynta ka sngi ka plielad ïa ngi ban wad ïa ki lad ki lynti ban pynkhraw bad ai bor shuh shuh ïa ki nongthoh khubor bad ki lad pathai khubor satlak ka pyrthei. Ka long ruh ka sngi ha kaba ngin kynmaw ïa kito ki nongthoh khubor kiba dang don ha byndi bad kito kiba la shah pynïap tang na ka daw ba ki thoh ïa ka jingshisha khlem riej bad ba ki pyndep hok ïa la ka kamram.

Shisien peit, ngi lah ban ong ba ha ka jylla Meghalaya jong ngi ki nongthoh khubor bad ki lad pathai khubor ki dang ïoh hi ïa kata ka jinglaitluid ha kaba ïadei bad ka jingtrei jong ki. La katta ruh ki don hi ki jingjia ha kaba ki nongthoh khubor bad ki nonglum khubor ki la shah thombor ne shah ujor. Ha kawei ka sien kaba la jia phra snem mynshuwa, ki briew ka party UDP ki la ujor FIR pyrshah ïa uwei na ki Columnist ba kham paw ka jylla, u Rev. H. H. Mohrmen tang na ka daw ba u la thoh pyrshah ïa ka sorkar MUA ba la lamkhmat da ka Congress bad u Myntri ba dei peit ïa ka tnad Geology & Mining (uba na ka Party UDP) halor ka jingjlan jong ka sorkar ban pynmih ïa ka Mining Policy. Kane ka la jia ha u snem 2012. U Ma Mohrmen u la shah bat bad shah tohkit kumba ar kynta hapoh ka thanad ha Laitumkhrah bad la pyllait pat ïa u. Sa kawei ka jingjia kaba wan ha ka jingkynmaw ka dei kaba la jia ha u snem 2014 hadien ba ka NGT ka la khang ïa ka jingtih bad jingshalan ïa u dewïong ha ka jylla Meghalaya. Ha kane ka jingjia, ar ngut ki nonglum khubor, u Ruhipaia C. Phawa bad u D. Paul Lamare ki la shah thombor ha ki trai trok dewïong hapoh ka jingïalam u president ka JHTOA u Balen Thubru katba ki dang lum jingtip shaphang ki trok dewïong kiba kit dewïong pyrshah ïa ka hokum ka NGT. Kane ka la jia ha 4-mer, Mihmyntdu hajan ka sor Jowai bad ha kane ka jingthombor, kine ar ngut ki la shah shoh bad ka camera jong ki ka la shah pynjot. Kane ka case ka dang sahteng haduh mynta hapoh ka District Court ha Jowai. Lait na kine ki ar tylli ki jingjia, ngam da kynmaw eh ïoh don kiwei pat kiba la jia ha ka jylla jong ngi.

Hynrei, haba ngi phai pat sha la ka ri India jong ngi, ngin shem ba ki don bun ki jingthombor pyrshah ïa ki nongthoh khubor, ki lad pathai khubor bad ki nongpynmih khubor – la ki dei ha ki khubor ba shon ha kot, ki khubor lyngba ka internet ne ki khubor lyngba ki TV channel. Bad ka long kaei-kaei kaba sngew lehraiñ haba, kat nang leit ki snem, ka ri jong ngi ka la nang hiar kyrdan ha kaba ïadei bad ka jinglaitluid ki nongthoh khubor bad ki nongpynmih khubor. Kane ka paw lyngba ki kaiphod ka sengbhalang na Paris (France), ka Reporters Without Borders ha kiba la paw ba ka ri India ka la hiar sha ka kyrdan kaba 142 mynta u snem (2020) hapdeng ki 180 tylli ki ri kiba ka la tohkit. Haba ïanujor bad ka ri jong ngi, ki ri ba marjan jong ngi kum ka Afghanistan, Sri Lanka, Nepal bad Bhutan ki long kiba kham shngaiñ na ka bynta ki nongthoh khubor. Ha u snem 2002, ka ri India ka don ha ka kyrdan kaba 80 bad ka la nang hiar nang hiar haduh ka kyrdan kaba 140 ha ki snem 2013-14. Ha u snem 2016, ka kaiphod jong ka Reporters Without Borders ka kdew ba ka ri India ka long kawei na ki ri kiba long kiba ma tam na ka bynta ki nongthoh khubor hadien jong ka Iraq bad Syria. Ki ri kiba shngaiñ tam na ka bynta ki nongthoh khubor ki kynthup ïa ka Norway, Finland, Sweden, Netherlands, Denmark, Switzerland, New Zealand, Jamaica, Belgium bad Costa Rica (Top 10).

Lada ngi wad ïa ki daw balei ba ka ri jong ngi ka la hiar kyrdan ha ka jinglaitluid ki lad pathai khubor, kan sa paw hi lada ngi peit ïa ki jingjia kiba la jia ïa ki nongthoh khubor bad ki nongpynmih khubor ha ka ri jong ngi. Ha u snem 2013, 8 ngut ki nongthoh khubor ki la shah pynïap bad dei na kine ki jingjia ba ka ri jong ngi ka la nang hiar kyrdan. Katkum ka kaiphod jong kawei ka jingtohkit kaba kyrteng “Getting Away with Murder”, la jia kumba 200 sien ki jingthombor ba shyrkhei pyrshah ki nongthoh khubor hapoh India hapdeng ki snem 2014 bad 2019 bad kumba 40 ngut napdeng kine kiba la shah pynïap. Bun na kine ki la shah pynïap namarba ki la pynmih ïa ki khubor pyrshah ïa ka jingbamsap bad ka jingpynkheiñ aiñ kiba don ha ka bor bad kiba hehspah. Ha u snem 2017, ka jingshah siat ïap ka Gauri Lankesh, ka editor jong ka Lankesh Patrike, ka kot khubor ba shisien shitaïew ha ka ktien Kannada, ka la pynpaw ïa ka jingshlur jong kiba shongshit niam Hindu ban pyntriem ïa kiba kren pyrshah ïa ka jingdum. Ka long kaei kaei kaba lyngngoh ba don kiba lehkmen halor ka jingshah siat ïap jong ka Gauri Lankesh bad don hapdeng kine kiba lehkmen ba u Myntri Rangbah duh ka ri jong ngi, u Narendra Modi u bud ïa ki ha ka Twitter. Sa kawei ka jingthombor ba shyrkhei ïa ki nonghtoh khubor ha India ka dei ka jingshah siat pynïap ïa u editor ka Rising Kashmir, u Syed Shujaat Bukhari ha u Jylliew 2018 ryngkat bad ar ngut ki bodyguard jong u. U Bukhari u la long uwei na kiba kwah ban rah ïa ka jingïasuk hapoh ka jylla Jammu & Kashmir. U la pynlong bun tylli ki jingïalang paidbah ban wanrah jingsuk ha Kashmir bad kane ka la pynsakhrai ïa ki lehnoh ha Kashmir. Ha kajuh ka por, u la thoh shaphang ki kam pyrshah ki aiñ longbriew manbriew kiba la leh da ki shipai India ha Kashmir bad kane ruh ka la pynsakhrai ïa ki bor shipai. Kumta u la long u langkñia hapdeng kine ar liang.

Hynrei, kaei kaba sngewma mynta ka dei ba ïa bun ki kot khubor bad ki channel TV la long trai da ki Politician, ki Political Party bad ki Company baheh. Ha ka jingkren jong u ha ka National Press Day Function ha Shillong ha u snem 2018, u Myntri Rangbah ka jylla ha kata ka por, u Mukul Sangma u la ong ba ka long kaei kaei ka bym dei ïa ki Politician ne ki Company heh ban long trai ne pynïaid ïa ki lad pathai khubor. Kane ka jingong jong u ka long kaba shongnia namarba lada u politician u long trai ïa ka kot khubor ne ka TV channel, hato, kato ka kot khubor ne ka News Channel kan pynmih ne em ki khubor pyrshah ïa u lada jia ba u bamsap ne pynkheiñ ïa ki aiñ? Ha ka jylla jong ngi, lehse, ki dang duna ki kot khubor ne ki channel kiba long trai da ki politician, hynrei ha kiwei pat ki bynta ka ri jong ngi, la don bun ki kot khubor bad ki channel khubor kiba long trai da ki politician bad ki kompani heh bad kane ka long kaei kaei kaba ktah ïa ka jinglaitluid jong ki nongthoh khubor. Kum ban ai nuksa, ka la jia ha u snem 2017 ba u Paranjoy Guha Thakurta, u editor jong ka Economic and Political Weekly, u khlem banse ban resign na ka kam namarba ki trai jong kane ka kot khubor ki la pynbor ïa u ban weng noh ïa ka khubor jong u kaba pynpaw ba ka sorkar jong u Narendra Modi ka la leh shilliang ne leh sngewieid da kaba ai ïa ka contract kaba 500 klur sha ka company Adani Group kaba na Gujarat.

Ha ka liang jong ki company heh, ngi la ïohi kumno ba ka company jong u Anil Ambani, ka Reliance Infrastructure, ka la mudui sha ki kashari bad phah siew bai mynraiñ khmat pyrshah ïa ki katto katne tylli ki nongpynmih khubor hadien ba ki la kylli bun ki jingkylli shaphang ka jingïoh bynta jong ka company jong u ha ka Rafale Deal (ka contract ban shna ïa ki liengsuiñ ïapom Rafale). Wat u khun jong u President ka BJP ruh, u Jay Shah, u la ai case pyrshah bad phah siew bai mynraiñ khmat ïa ka “The Wire” (ka khubor lyngba ka internet) bad ki nongthoh khubor jong ka hadien ba ki la pynpaw pyrthei ba ka company jong u ka la kiew joit hapoh ka shisnem ha ka jingïoh kamai hadien ba ka BJP ka la wan ha ka bor ha Delhi. Ka jingtuklar ki company heh (corporate) ha ka jinglaitluid jong ki lad pathai khubor bad ki nongthoh khubor ka la nang kiew ha ka ri bad kylleng ka pyrthei khamtam habba ki khubor ki pynpaw ïa ka jingbamsap bad jingleh tuh jong ki ha ki kam bad korbar jong ki.

Kawei na ki jingeh jong ki nongpynmih khubor bad ki lad pathai khubbor ka long ban siew ïa ka lut ka sep ha kaban pynmih ïa ki khubor bad ban siew ïa ki tulop jong ki nongtrei jong ki kiba kynthup ïa kiba trei ha office bad ki nonglum khubor. Kawei ka lad ba kongsan ïa ki kot khubor bad kiwei pat ki lad pathai khubor ban pynmih pisa ka long lyngba ki advertisement na ki riew shimet, ki company bad na ka sorkar. Ki sorkar jylla bad ka sorkar pdeng ki dei kiba noh synñiang kham bun ha kane ka liang namarba ki pynmih bun ki advertisement shapang ki scheme bapher bapher bad ki jingpyntip man la ka por. Kumta, ki bor sorkar ki la ju pyrshang ban set ïa ka ktien jong ki nongpynmih khubor da kaba maham ban pynduh ïa ki advertisement. Kane ka jinglushia ki bor sorkar ha ka kam thoh bad pynmih khubor ka ktah jur ïa ka jinglaitluid jong ki. Hateng, ngi ïohi ba ka sorkar ka pyndonkam da kiwei pat ki lad bad ki buit ban set ne khñiot ïa ki khubor kiba long pyrshah ïa ka ne kiba pyni ïa ki jingduna jong ka. Ha u Naiwieng jong u snem 2016, ka sorkar pdeng ba lamkhmat da ka BJP ka la hukum ïa ka channel khubor NDTV ban khang na ka bynta ka shisngi. Ka sorkar ka ai daw ba ka NDTV ka la pyllait paidbah ïa kiei kiei ki ba dei ban buhrieh. Ha u snem uba bud (2017), ka sorkar pdeng ka la phah ïa ka CBI ban jurib ïa u nongseng ka NDTV, u Pranoy Roy bad ka lok jong u. Bun kiba ong ba kane ka jingleh ka sorkar pdeng ka long ban pyni ba kam sngewtynnad ïa kiba kren pyrshah sorkar. Ha u snem 2018, kawei ka prokram jong ka ABP News channel kaba kyrteng “Master Stroke” kaba pynïaid da u Punya Prasun Bajpai ka la shah pynïong (black out) tang namar ba u Bajpai ha kane ka prokram jong u, u la pyni ïa ka jingshisha pyrshah ïa ka jingkam jong kiwei shaphang ka jingjop jong ki scheme ka sorkar u Modi. Hapoh ka shibnai, ki nongpynïaid jong kane ka channel ki la pynbna ïa ka jingiehnoh kam jong u Bajpai ryngkat bad u Milind Khandekar (editor in chief) bad u Nikhil Kumar (Executive producer). Kaei ka long kaba lyngngoh ha ka por jong kane ka jingjia ka long ba ka company jong u Baba Ramdev (uba long u nongkyrshan bakhlaiñ ka BJP bad u Modi), ka Patanjali, ka la weng noh ïa ki advertisement jong ka na kane ka channel bad hadien ka jingmih jong u Bajpai bad kine ar ngut na ka channel, ka la bteng biang ban pynmih ïa ki advertisement jong ka. Ki dang don ki nuksa ha kiba ki bor sorkar ha ki jylla ne ha Delhi bad ki company heh ki la juh pynsangeh ne byrngem ban pynsangeh ïa ki advertisement jong ki ha ki lad pathai khubor haba kine ki pynmih khubor pyrshah ïa ki. Hynrei ki nongthoh khubor kiba bat ïa la ki tynrai jong ka jingshisha kim ju riej ban iehnoh kam ban ïa kaba shah set ne shah khñiot. Ka jingiehnoh kam jong u Abhisar Sharma uwei na ki News Anchor na ka ABP News channel ha u Nailur 2018 ka kdew shai ïa kane.

Kaei kaba kham ma na ka bynta ka jinglaitluid ki lad pathai khubor ka dei ka jingnoh shilliang ki nongthoh khubor bad ki nongpynmih khubor. Kane ka wanrah ka jingduh kaba khraw na ka bynta u paidbah namarba haba ka khubor ka long kaba noh shilliang, ka la long pynban ka khubor kaba jler. Bunsien, ka daw ba ki nongthoh khubor bad ki nongpynmih khubor kin noh shilliang ka long ban ïoh myntoi shimet ne ban pynkhraw ïa la ka kam lajong. Bad haba ki nongthoh khubor bad ki nongpynmih khubor ki noh shilliang sha ka sorkar, kine ki kylla long tang kum ki nonglamktien jong ka sorkar. Ka bor jong ki lad pathai khubor bad ki nongthoh khubor ka wan na ka hok jong ki ban buh ïa ki jingkylli hakhmat kito kiba don ha ka bor. Kane kam mut ba ki nongthoh khubor ki dei ban pyrshah barabor ïa kiba don ha ka bor ne ka sorkar hynrei ki dei ban hushiar ïoh ki kylla long pynban tang ki atiar jong kiba don ha ka bor. Ki nongthoh khubor bad ki lad pathai khubor kiba bynda ïa la ka jinglaitluid ki long kum ka mluh kaba la duh ïa la ka jingbang. Bad haba ka long kumne, ki nongpule bad ki nongpeit ïa ki khubor ki dei ban kdew kti bad pyni ïa kum kine ba ki la ïaid sakma na ka kamram jong ki. Ngim dei ban klet ba ka lad pathai khubor (media) ka dei ka rishot kaba saw ha ka synshar paidbah ryngkat bad ka ïingdorbar thawaiñ (legislature), ka ïingkashari (judiciary) bad ka kynhun ki nongpynïaid kam sorkar (executive). Lada kane ka rishot ka bam kruiñ, ka synshar paidbah kan hap ha ka jingma.

D. R. Michael Buam | Author of LAMCHWA, an English Romance fiction.
Read Sample chapters at:
https://notionpress.com/read/lamchwa
Download my free ebook (a short story) here:
https://www.smashwords.com/books/view/533653