Ym don ba shah kem halor ka jingshah siat iap u nongniah trok ha ki BSF ha Mawshun: Dy CM

Syllad | The Rising MeghalayaSeptember 21, 2023

U Symbud Myntri Rangbah ka jylla uba khmih ia ka Home (Police) u Bah Prestone Tynsong mynta ka sngi Palei u la pyntip ba ka jingtohkit ka dang iaid shakhmat ha kaba iadei bad ka jingjia shah siat iap jong u nongniah trok ha ki shipai BSF kaba la jia ha ka shnong Mawshun, EKHD kaba la jia ha ka 5 tarik u bnai Jymmang ba la dep.

Haba jubab ia ka jingkylli ba la wanrah da u nongmihkhmat ka NPP na Sohra u Bah Gavin Miguel Mylliem hapoh ka iingdorbar thawain, u Bah Tynsong u la ong ba ki don artylli ki FIR ba la ujor halor kane ka jingjia kaba la jia ha ka 5 tarik u Jymmang 2023 ha ka por kumba 10:24 mynmiet ha kaba u (L) Running Nongkynrih uba dei na ka shnong Lalynteng uba dei u nongniah jong ka trok kaba don ia u No (ML 05F 3885) u la shah ther kuli ha ki BSF ha ka shnong Mawshun hajan kawei ka petrok pump ha ka surok ba NH-40 (Shillong-Dawki Road, Pynursla.

U la ong ruh ba namar kane ka jingjia shah ther kuli une u nongniah u la khlad noh hashen namar ka jingmynsaw. U la ong ba ia kawei ka FIR la ujor da uba haiing jong une u lanot u Bah Riverskhem Nongkynrih bad kawei pat ka FIR ka dei kaba la ujor da ki BSF pyrshah ia une u lanot hapoh Pynursla police station.

“Ka jingtohkit halor kine ki artylli ki jingujor ka dang iaid shakhmat, bad na ka liang ki heh pulit ki la trei shitom ban lap ia ki jingshisha baroh ha kaba iadei bad kane ka jingjia,” ong u Dy CM uba la bynrap ruh ba ym shym la don ba shah kem ha kaba iadei bad kane ka jingjia.

“Katkum ka FIR ba la ujor da u Bah Riverskhem la pyntip ba une u nong ujor bad uba shipara arkmie jong u, kata une uba la khlad noh ki dang mih na ka shnong Umthli ban pynkynriah ia ki muid jong u trai shapoh ka sem bad ynda ki la poi ha ka shnong Mawshun, une u lanot u la khun ia ka kali sha ka liang ka mon na ka bynta ban pynhap ia kine ki muid. Hynrei, ha kaba kum kane ka por kawei ka trok rit jong ki BSF ruh ka la wan nadien jong ki bad kynsan kynsan khlem kano kano ka jingmaham ki BSF ki la tur shajan u nongujor bad une u lanot da kaba sdang ban ther kuli kaba la pynlong ia une u lanot ba un khyllem hajuh,” ong u Bah Prestone.

Hynrei, ha ka FIR kaba long pyrshah ia une u lanot uba dei u nongniah u (L) Running Nongkynrih, ki BSF ki la ong ba ha katei ka sngi ki shipai BSF ka 4 Bn kiba don ha ka jingap pahara da ka kali ha ka surok Pynursla-Dawki hajan ka shnong Wahkdait ki la kyntu ia utei u nongniah ba un pynsangeh ia ka kali na ka bynta ban talasi. Hynrei la ong ba ha ka jaka ban sangeh u nongniah u la pyrshang ban phet krad da kaba thmu ruh ban tynrah ia ki dkhot jong ki BSF kiba don hapdeng ka kam.

Kumta hapdeng ka jingma ki BSF ki la siat ar kuli sha suin hynrei u nongniah um shym la sangeh bad pyrshang ban tynrah ia ki. Kumta haba la pynthikna ia ka jingma jong ka jingim ki shipai ki la siat sha ki bynta taiar jong ka trok da ka jingthmu ban pynsangeh ia ka kali, hynrei u nongniah u la khun sha ka liang ka diang bad tynrah ia u divider.

Shuh shuh u Dy. CM u la ong ruh ba ka jingshah siat jong une u lanot ka la pynmih ia ka jingkhih bitar jong ki nongshong shnong ha kaba ka la mih ruh ka jingkhihwin kaba pynthut ia ka jinglong jingman. Hadien kane ka jinglong jingman ha ka thain, ki bor pulit ki la pynjur ia ka jingphara bad bishar bniah ia ka jinglong jingman baroh kata tad haduh ba ka shongsuk shongshngain ka la wanphai pat ha katei ka jaka.