Ym don dak shin ban pyndam ka sorkar iaka Police Outpost ka Assam ha Saba, ujor biang ka San Shnong ha u MLA Mowkaiaw

Syllad | The Rising MeghalayaOctober 17, 2021

Ka jingkular u Myntri Rangbah ka Jylla Conrad K Sangma iaka San Shnong Development Organisation (SSDO) ban weng mardor iaka Border Police Outpost ka Assam haka shnong Saba, West Jaintia Hills kala kut tang haka jingkular khlem ki soh ki sla.

Kane ka Border Police Outpost ne ka ktem pulit jong ka Assam kaba la tei ha Langhong Sangdathli, Saba kaba la tei naduh u bnai Lber Iaiong jong une snem bad la plie paidbah iaka da U Rupsing Teron,  MLA  Boithalangso LAC, West Karbi Anglong haka 12 tarik Jylliew 2021.

Kumban shu pynkynmaw ba ka bor synshar district jong ka West Jaintia Hills District ruh kala pynsangeh ia kane ka jingtei ktem pulit ka Assam ha katei ka jaka haka 21 tarik Iaiong 2021, pynban ka Assam kala iaid shakhmat bad pyneh triang bad kam trai ba kane ka jaka ka hap sha ka sorkar Assam.

Ka sorkar Assam kala kam ba kane ka jaka ka hap hapoh ka Jrikyndeng Police Station.

Ka sorkar Assam kala plie paidbah iaka ktem Pulit ha Saba

Ka San Shnong Development Organisation haka 27/04/2021 kala pyntip ïa u DC West Jaintia Hills District ïa ka jingtei beaiñ jong ka Sorkar Assam ia ka Police Outpost ha ka jaka ka ba kyrteng (Langhong Sangdathli) ka ba hap hapoh u pud u sam jong ka Shnong Saba West Jaintia Hills District.

Ha ka juh ka por ka San Shnong Development Organisation kala ujor sha u Myntri Rangbah Sorkar Jylla ha ka jingdonlang jong u MLA Mowkaiaw haka 24/06/2021. U Myntri Rangbah ula kular ban weng noh mardor ia kane ka Police Outpost ka Assam.

“Haduh mynta ngim shym la ïohi ïa kiei kiei ki dak ki shin ba ka sorkar Jylla kala leh ban tuklar ne weng noh ia katei ka outpost,” la ong ki nongialam ka San Shnong haka dorkhat kaba kila ai sha u MLA Mowkaiaw haka sngi Saitjain.

Katkum ka dorkhat la ong “Ka Sorkar Jylla kan pynbeit noh kloi ia u pud u sam namar naduh ba ka Sorkar Assam bad sorkar Meghalaya ki la weng noh iaka Status Quo, ngi ïohi ia ka jingthombor ki briew Karbi lane Assam ha kiba bun ki bynta bad kane ka la wanrah ka jingthut ha liang ka shong suk shong sain, ha kaba ki ïai bteng ia ki kam pyntriem pyrshah ia ki briew jong ngi ki ba shong basah ha kine ki thaiñ khappud.”

Ka San Shnong kala kyntu ia u MLA Mowkaiaw ban lum lang ia baroh ki nonshong shnong ba hap haki thaiñ khappud Block-I bad II khnang ban ioh pynbeit ha kano ka rukom ban ioh ia u pud u sam uba paka.

Shuh shuh ka San Shnong kala dawa ban buh iaka ktem pulit ka sorkar Jylla ha khappud. Na kaliang u MLA ula kular ban pynkloi ban tei ha Barato, katba ha kaba iadei bad ka ktem pulit ka Assam u khlem ong eiei, la ong ki nongialam ka San Shnong Development Organisation.