Ym don doktor shem jingeh ki nongpang bad nongshim dawai ha CHC Namdong, byrthen khang tala ka KSU

Syllad | The Rising MeghalayaJanuary 4, 2023

Ki paidbah nongpang bad nongshim dawai haka thain ka Namdong bad ki shnong ba marjan kiba hap haka Namdong CHC kila hap ban mad iaka jingeh namar bym don doktor mynta la shi bnai hadien ba i doktor ba dei peit iaka CHC ila shim shuti.

Ka Khasi Students’ Union (KSU) kala kam ba ka paidbah kane ka thain kila buh jingujor halor ki jingeh ba ki kynduh naba ym don doktor hakatei ka CHC la shi bnai mynta hadien ba i doctor i shim shuti.

U General Secretary KSU Namdong Area Unit, u Juhhi Tariang ula ong ba ka KSU ka dap da ka jing sngewdiaw mynsiem haba la dep kyntiew kyrdan dangshen iaka PHC sha ka CHC namar ba kam lah ban ai jingshakri ia u paidbah. “Ngi sngew lehrain ban ong balah dep upgrade ym don tang iwei i doctor ha kane ka jaka ai jingsumar, ki staff ba don hangne ruh kim lah ban pdiang nongpang namar ymdon doctor,” la ong une u nongialam ka KSU

Ka KSU kala dawa naki bor ba dei peit ka tnad ka koit ka khiah ban pynbiang mardor iaki Doctor bad ki staff Nurse bad kiwei kiwei ki jingdonkam ha kane ka jaka ai jingsumar ia u paid nongpang.

Ka KSU kala ong ba lada ka tnad ka koit ka khiah lada ym lah ban pynbiang iaki jingdonkam ka hospital kan khang tala noh mardor. Kala ong ruh ba kam hun tang iaka building baheh khlem ki nongtrei ba biang. Ka sorkar ka dei ban thung nongtrei katkum ki kyndon treikam jong ka CHC.

Katkum ki kyndon jong ka sorkar pdeng, ka CHC ka dei ban peit da ki four medical specialists kiba kynthup ia u Surgeon, Physician, Gynecologist bad Pediatrician bad 21 ngut paramedical bad kiwei kiwei ki staff.

Ka CHC ka dei ban don 30 jingthiah kawei ka OT, X-ray, Labour Room bad Laboratory nalor kiwei kiwei.

Kumban shu pynkynmaw ia ka Namdong PHC la kyntiew kyrdan iaka sha ka CHC haka 21 Naiwieng 2022 da u Myntri Rangbah ka Sorkar Jylla Conrad K Sangma.

Kane ka PHC kala shakri haduh 29 snem kum ka PHC iaki 51 tylli ki shnnong naduh u snem 1993. Mynta ka don 4 tylli ki sub centre bad ka jingbun briew baroh kala kot kumba 32,5977 ngut.

Wat hadien bala plie paidbah kane ka CHC Namdong ka don tang iwei i doktor, hynrei namar ba i shim shuti ki nongtrei kim lah shuh ban pdiang nongpang.