Ym don jingiadei ki jingjia kawang petrol bom bad ka jingshah kem ki dkhot ka KSU: Dy CM

Syllad | The Rising MeghalayaMay 2, 2024

U Symbud Myntri Rangbah ka Jylla uba khmih ia ka Tnat kam pohiing u Bah Prestone Tynsong haka 1 tarik Jymmang, ula ong ba jingjia kawang petrol bom kiba la jia naduh kine ki khyndiat sngi ba la dep kim don satia kano kano ka jingiadei bad ka jingshah kem jong ki dkhot ka Khasi Students’ Union (KSU).

Haba kren sha ki lad pathai khubor u Myntri u la ong ba na ka liang ka sorkar kan pynthikna ia ka jingsynshar jong ka ain ha ka jylla bad ban ym shah iano iano ruh ba kin shim ia ka ain ha la ki jong ki kti.

Ia kane u Myntri u la pynpaw hadien jingshah kawang petrol bom jong ki artylli ki police station bad ka ophis jong ka tnat MGCC haka 1 tarik Jymmang.

U Bah Tynsong u la ong ruh, “Ngi la dep ban bthah ia u Director General of Police (DGP) kumjuh ia ki SP  bad ka kynhun pulit ba kin long kiba pynkhreh bha bad ban pynthikna ba kum kine ki kam thombor kin ym wan jia shuh hadien habud.”

Watla katta u Dy CM u la ong ba un ym pyniasoh satia ia kine ki jingjia kawang petrol bom bad ki jingjia shah kem ba dang shen jong ki dkhot ka KSU halor ki laitylli ki jingjia kam pyniap kiba la jia ha Ichamati bad ha Mawlai Mawroh. U la ong ruh ba ka ain kan iaid laka jong ka lynti.

“Shah Ngan ong ha phi kawei, Ngam shym la ong la ki dei ne kim di ki dkhot ka KSU. Haba ngi kem ia kino kino ki briew, phi dei ban sngewthuh ba ngi pynshong nongrim na baroh ki liang, hangno, kumno bad balei, bad kumta ka sdang ka jingtohkit bad hadien ka leit sha ka iingkashari ba kan shim ia ka rai. Kumta ka jingpynpaw ka jong nga ka long kaba shai. Ngam shym la ong ba kito ki briew kiba la dep shah rah ki dei ki dkhot ka KSU ne na kino kino ki kynhun, hynrei ailad ia ka ain ba kan leh ia kaba donkam,” bynrap u Myntri.

Nalor kata u la ong, “Ngam ngeit satia ba kine ki jingjia kawang petrol bom ki la wan jia namar ka jingshah kem ki dkhot ka KSU. Nga sngew thikna ba ma ki ruh ki dei ki briew kiba la shemphang,” ong u Bah Tynsong da kaba bynrap ba kin ym ailad ia kiba kum kine ki jingjia ba kin wan jia. Kumta, ngin pynthikna ba kan ym don kano kano ka jingthut ha ka jinglong jingman ha ka liang ka suk ka sain.”

Haba kyntu ia ki nongshong shnong ba kin long kiba jai jai, u Dy CM watla katta u la ong, “Ka sorkar bad ka tnat pulit ki don ha ka kam ban pynthikna ba ki nongshong shnong kin don hapdeng ka jingshngain.”

Halor ka jingkylli la ka sorkar jylla kan pan bor pahara shuh shuh, u bah Tynsong u la ong, “Ia mynta hi ngi dang bishar bniah halor kane ka bynta, hynrei kumba Nga ong ha phi, ngin ym thiah bad ngin pynthikna ia ka jingtreikam jong ka ain.”

Ha kawei pat ka bynta, u Dy CM u pyntip ruh ba ki la pynmih ia ka jingbthah sha baroh ki tnat treikam bad ki ophis sorkar ba kin long kiba husiar bad ban pynthikna ban pynieng ia ki kali jong ki jaka kiba shngain.