Ym don jingthmu ka BJP ban khot iasoh ia u Mukul Sangma sha ka party: Dr Ao

Syllad | The Rising MeghalayaJanuary 4, 2024

U National Vice President ka BJP uba dei khmih ruh ia ka party ha Meghalaya, u Dr M Chuba Ao haka sngi Palei u la ong ba haduh mynta hi ka party BJP kam don satia ia kano kano ka jingthmu ban khot pyniasoh ia Myntri Rangbah barim ka jylla u Dr. Mukul Sangma sha kane ka party.

Haba kren sha ki lad pathai khubor u Dr Ao u la ong, “Haduh mynta hi ym pat don mano mano ban wan iakren hapoh ka party na ka bynta u Mukul Sangma. Kane ka lah ban dei tang ka jingiakren ki briew shaphang kane.”

Nalor kata u Dr Ao u la ong ruh ba na ka liang ka party ka ieh ha u Dr Mukul la u kwah ne em ban wan pyniasoh, hynrei na ka liang ka party hi kam pat ju leit khroh ia u na ka bynta ban wan pyniasoh sha ka party.

Lah ban kdew ba ki la don ki khubor kiba la mih lyngba ki lad pathai khubor ha kine ki khyndiat bnai ba la dep kiba ong ba une u nongialam ka Trinamool Congress ka Meghalaya u lah ban leit pyniasoh noh ia lade sha ka seng BJP.