Ym don jingthmu ka Sorkar ban dang pynim ia ka Kynshi Hydro Project: Mondal

Syllad | The Rising MeghalayaAugust 21, 2024

U Myntri ka tnad Bording u Abu Taher Mondal ha ka 20 tarik Nailar u la ong ba ka sorkar kam don shuh ia ka jingthmu ban pynim ia ka Kynshi Power Project Stage-I, hynrei ka la shim pat ia ki sienjam ban pyntreikam ia ki katto katne ki project bording ha ka wah Kynshi.

Ia kane u Myntri u la pyntip sha ka kynhun jong ka Joint Committee of Local People on Kynshi Hydro Power Project (JCLPKHPP), kaba kwah ban tip la ka sorkar ka don ne em ka jingthmu ban pynim ia ka Kynshi Hydro Power Project stage-I.

Haba kren sha ki lad pathai khubor u Mondal u la ong, “Nga la ong ha ki ba ia mynta hi kam don kano kano kaba kum kata ka jingthmu, hynrei ngi dang iai trei ban peit ia kiwei pat ki lad pynmih bording ha ka wah Kynshi.”

U la pyntip ruh ba na ka liang kane ka kynhun ka la pynthikna ban ai ka jingkyrshan kaba pura ia ka sorkar ha kaba iadei bad kane ka bynta.

Ha ka shithi ba la ai sha une u Myntri, u Chairman ka JCLPKHPP u Bah Roshem Myrthong u la ong, “Ngi kwah ban tip la ka dang don ne em kano kano ka jingthmu ha ki por ki ban dang wan ban pynim biang ia ka Kynshi Hydro Power Project.

U la pyntip ruh ba ka committee ka la phah da ka shithi ha ka 8 tarik u Lber 2024 sha u Myntri Rangbah ka jylla ban pyntip ia ka jingsngewsih jong ka halor ka kam kaba khlem pat pyndep kaba iadei bad ka project bording.

Lah ban pynkynmaw ba ka Sorkar Jylla ha ka 12 tarik Nailur, 2023 kala pynduh noh ia ka Kynshi Power Project stage-I hadien ka jingshem ba kam iahap shuh bad ka jinglut jingsep.