Ym don Magistor & DSP na Meghalaya ban ïasaid bad u Magistor na Assam haka jingshna surok ha Lapangap

Syllad | The Rising MeghalayaMay 16, 2019

JOWAI: Ka jingbymsuidniew jong ka sorkar Meghalaya ha kaban peit ïaka jingeh ki paidbah ha khappud Meghalaya Assam kala paw tynkreiñ haka sngi Balang ha ka shnong Lapangap, ka shnong kaba don ha khappud West Jaiñtia Hills District bad West Karbi Anglong District, Assam ha kaba ka sorkar kam shym la phah satia ïa uno uno u magistor ne u gazetted police officer ban iasaid ïaka jingpyrshah ka sorkar Assam ïaka jingshna surok shnong jong ki paidbah nongshong shnong ka Lapangap.

Ki nongshong shnong ka Lapangap, ka shnong kaba jngai kumba 12 KM na Khanduli kala rai ban maramot ïaka surok na Lapangap sha Khanduli (Kaba iaid lyngba ka shnong Langkeroi kaba hap haka West Karbi Anglong District), hynrei ki Pulit Assam kila wan ban pynsngeh haka sngi Nyngkong namar ba kim shym la pyntip sha ka bor synshar district ka West Karbi Anglong.

Hynrei ka Dorbar Shnong Lapangap kala shim ïaka rai ba la kumno kumno kin bteng beit ïaka jingshna ïaka surok kaba khohruh khohram ban suk ka iaid ka ieng ki kali motor bad u paidbah haka sngi ba Ar hadien ba ki pulit Siatsama Police Outpost kila ong ba kiin wan ban iadonlang ban synran ïaka jingtrei surok jong ki.

Kumta ki paidbah ka shnong Lapangap kila mih paidbah sa shisien haka sngi Balang ban shna ïaka surok khyndew kaba dap da ki thliew ki syar ban lait ki kali motor ban btuid bad ban sahkut haka aiom slap. Kane ka surok ka dei kaba kaba la iehshrah ka sorkar Meghalaya da ki phew phew snem mynta.

Ki kynhun Pulit Saitsama OP bad Nartiang PS kaba ialam da ki Officer in Charge kila wan sha katei ka shnong, kumjuh ruh u MDC Barato Mukroh Aibor Shadap bad MDC Mynsngat Khanduli u Dawan Lyngdoh kila wan sha katei ka shnong hadien ba u paidbah ula pyntip ban don ka jingtrei ïa katei ka surok.

Hadien katto katne por bala ïaid ka jingtrei surok ki paid nongshong ka Lapangap, ka kynhun pulit jong ka Assam kaba la hiar da ki 2 tylli ki trok ryngkat ki tiar ialeh hapoh ka jingïalam u Border Magistrate West Karbi Anglong, Assam Robert Tualor, DSP P Gogoi bad kiwei kiwei kila wan sha katei ka jaka mar mar ban pynsangeh ïaka jingtrei surok.

U Robert, “Ngi wan hangne ban pynsangeh ïaka jingtrei namar ba ngi la ïoh ka jingujor na ki nongshong shnong ka Langkeroi ba ka don ka jingshna surok khlem ka jingpyntip sha ki bor district jong ki arliang mamla ka West Jaiñtia Hills District bad West Karbi Anglong District.”

Ki Pulit Nartiang bad u Waheh Chnong Lapangap kila pynshai ha u border magistrate ka West Karbi Anglong ba kam don kano kano ka jingshna surok, hynrei ka tang ka jingmaramot surok shuwa ban sdang ka aiom slap ban suk ka iaid ka ieng kali kaba ki shait trei paidbah manla ka snem.

Kumta u Magistor ka Assam ula bthah ïa u Waheh Shnong ka Lapangap bad Goanbura ka Langkeroi ban pynbeit para maki. Watla u magistrate u kwah ban pynsangeh ïaka jingtrei surok shipor haduh ba kila dep ban pyntip sha ki bor district jong kli arliang mamla, hynrei ki arngut ki MDC bad ki paidbah ka Lapangap ki kwah bad dawa ban bteng ka jingmaramot iaka surok bad ka sur u paidbah kala jop.

Haba kren bad u nongthoh khubot u Robert ula ong, ” Ngi ailad ba ki nongshong shnong ka Lapangap kin trei ïa kane ka surok namar ba ka dei ka jingtrei mon sngewbha u paidbah, hynrei lada dei ki skim sorkar ki bor district lane ki sorkar arliang mamla kumba la iakut kin hap ban ïapyntip mar kylliang namar ba kane ka jaka ka dang hap haka jingiakhajia pud.”