Ym hun ka CoMSO iaka jingbympdiang ka PSC iaka jingtyrwa pynkylla iaka Sixth Schedule

Syllad | The Rising MeghalayaAugust 25, 2021

Ka CoMSO ka pynpaw ia ka jingbymhun bad pyrshah jur halor jingbym shym la pdiang ka Parliamentary Standing Committee (PSC) ïaki jingai jingmut jong ki ADCs, ka Sorkar Jylla, ki Dorbar Trai Ri bad ki kynhun sengbhalang bapher bapher jong ka Jylla ha kaba iadei bad ka jingtyrwa ban pynkylla (Amendment) ia ka Khyrnit ba Hynriew jong ka Riti Synshar ka Ri India kiba long katkum ki Riti dustur bad ka jinglong jingman ka synshar khadar Trai Ri Trai Muluk ha kane ka Jylla.

Ka CoMSO kala phah bun tylli ki jingdawa bad jingai jingmut ha kaba iadei bad katei ka kam sha u Myntri ki Kam Pohing ka Sorkar India bad sha u Myntri Rangbahduh ka Ri India lyngba ki dorkhat, phewse bun na kine ki jingai jingmut kim shym la rung ha ka Report jong ka PSC, la ong ong Lamphrang Kharbani, general secretary, CoMSO bad bynrap ba ka CoMSO ka dawa na ka Sorkar India ba kadei ban pynrung ia ki jingai jingmut kiba la ai hashuwa bad kumjuh ruh jong ki ADCs kiba don ha ka Jylla ha kane ka Amendment.

U Roy Kupar Synrem , vice chairman CoMSO, ula ong ba ki jingdawa bad jingai jingmut kiba hakhmat duh nalor kiwei ki long ba dei ba ha ka Paragraph 12 A (b) jong ka Scheduled dei ban pynduh ia ka kyntien ‘President ‘ bad thep da ka kyntien ‘Governor’ khnang ba lada don kino kino ki Ain jong ka Sorkar Pdeng ki bym iahap bad ka riti dustur ne ka rukom Synshar khadar ka jong ngi ki Trai Ri, ka bor ban weng lane ban pynbeit ia kum kine ki Ain ne ki kyndon kan dei ha u Governor jong ka Jylla ym ha u President bad kane kan pynsuk ia ka rukom treikam bad kan pynjan ruh ban pyniohsngew ia ka sur jingdawa jong ngi kum ki Trai Ri. Kumba ka long ngi lah iohi ba watla ka Sorkar Jylla hi ki snem ba lahdep ka lah pass ia ki Resolution ban dawa pynsangeh ia ka jingpyntreikam ia ki Ain kum ka MMDR Act 1957 bad ka Forest Conservation Act, 1980 hynrei u President jong ka Ri India um shym lah pdiang bad kane ka lah wanrah jingeh ia ki Trai Ri trai Muluk.

Kaba ar na ki jingdawa ka jong ngi kadei ban weng noh ia ka kyndon kaba ailad ia kiwei pat ki Jaidbynriew ban shang thung lane sieh kum ki Nominated MDCs ha KHADC bad GHADC lyngba ka jingwanrah ia ki kyntien “Nomination of Unrepresented Tribes” ha kata ka Amendment. Na ka liang jong ka Kynhun ngim lah ban pdiang ia kane namar kane kan wanrah ia ki kynrum kynram bad kumba ia ki ADCs la shna khnang na ka bynta ban iada ia ngi ki rit paid Trai Ri trai muluk, kane ka jingthmu ban thung jubor ia kiwei pat ki Jaidbynriew ha ki District Council ka pynpaw ba don ei ei sha lyndet bad ia kaba kum ka kynhun ngim nym pdiang bad ngin ieng pyrshah, la ong u Roy Kupar Synrem.

Shuh shuh u Synrem ula ong ba kaba lai na ki jingdawa ki jong ngi ka long ba ngi pyrshah ia ka jingthmu ban pynlong kha sang ia ki Dorbar Trai Ri ki jong ngi bad ki Panchayati Raj bad kumjuh ruh ki Municipal Council lyngba ka jingwanrah is kita ki Village Council ha kane ka Amendment. Ngi kren shai ba da lei lei kum ka Jaidbynriew ngin nym lah ban ia pein halor kane ka bynta ban pynduh bor ia ki Dorbar Trai Ri ki jong ngi. Kawei na ki jinglong ba kyrpang jong ka Jaidbynriew kadei ba ngi don ia ka rukom Synshar khadar kaba kham pher na kiwei pat ki Jaidbynriew bad dei namar kane ba ngi sa ioh ruh ka jingiada lyngba ka Khyrnit ba Hynriew. Hynrei kane ka Amendment ka thmu pynban ban pyniahap dor ia ngi bad kita ki rukom Synshar ha Ri Thor bad ban khiah jubor ia ka rukom Synshar ka jong ngi. Ngi maham ia ka Sorkar India ba kam dei ban wanrah ia kum kine ki kyndon ki ban ktah ia ka jinglong ba kyrpang ka jong ngi ki Trai Ri Trai Muluk pynban ka Sorkar India kadei ban pynkup bor shuh shuh ia ki Dorbar Trai Ri ki jong ngi lyngba ka Direct Funding bad kiwei kiwei.

Ka Kynhun ka sngew ruh ban pynpaw ba Ka jingkhlain jong ki ADCs kam shong ha ka jingbun khlieh briew hynrei ka shong ha ka jingtreishitom jong kita kiba shah jied kumno kin trei ban iada ia ka Jaidbynriew. Balei ki ADCs kin hap pynlut pisa ban siew tulop ia ki MDC ban Shu pynbun briew kai bad pynsepei ia ka pisa paidbah.

“Ngi dawa ba ka Sorkar India ka dei ba  burom ia ka jingsngew jong ki ADCs, ka Sorkar Jylla, ki kynhun Sengbhalang bad ia ki Trai Ri trai muluk hi baroh kiba don ha ka Jylla bad ba kan nym wanrah kino kino ki kyndon ki ban ktah ia ka jinglong kyrpang ka jong ngi bad lada kam sngap bad leh donbor na ka liang ka jong ngi ruh ngin nym shu sngap hynrei ngin ieng ban ia leh na ka bynta ka hok ki Trai Ri Trai Muluk,” la ong Lamphrang Kharbani, general secretary, CoMSO.