Ym hun ka JNC iaka jingrwai Anthem ka Jylla

Syllad | The Rising MeghalayaJanuary 22, 2024

Ka Jaiñtia National Council (JNC), Western Zone kala pynpaw iaka jingbym hun iaka jingrwai ‘State Anthem’ namar ba kane ka sur jingrwai la paw tang ka Khasi, Garo bad English bad la leh klet iaka Jaintia.

Kane ka jingrwai anthem ka dei kaba la pyllait paidbah haka 20 tarik Kyllalyngkot ha Tura haka jingrakhe iaka jingdap 52 snem ka jingioh jylla ba pura ka Meghalaya.

Ha u kyrwoh u vice president JNC Western Zone, u Ma Hamehi Bamon ula ong ba ka JNC ka pynpaw ba ka JNC kam lah ban pdiang da lei lei ruh iaka jinglyndet ka sorkar iaka ktien Jaiñtia na kane ka jingrwai anthem. Ula ong ruh ba kane ka pynpaw iaka jingibein bad iuhroit iaka hok jong ka Rilum Jaiñtia bad ktah iaka jingsngew u nong Jaintia.

U la ong ba ka jylla Meghalaya kadei ka jylla jong ki lai ki riewlum kata ka Khasi Garo bad Jaiñtia, naduh ba la ioh iaka jylla ba pura naka jylla Assam ha u 1972, ki don lai tylli ki major tribes Khasi Garo bad Jaiñtia, hynrei ka jingjah ka ktien Jaintia ka paw shai ba ka sorkar kaleh bymsuidniew iaka Jaintia bad la thep pynban da ka ktien nongwei (English).

Ka JNC kala kyntu iaka sorkar ban pynbeit ia kane ka jingrwai anthem bad ban jur iaki nongthaw ain ka Jaintia ha Jylla bad konsil bad kim dei ban shu sngap ne peitkai iaka jingleh ka sorkar.