Ym ïoh kam ki samla ba pass engineer haki kharkhana ha Rium Jaiñtia

Syllad | The Rising MeghalayaAugust 12, 2019

JOWAI: Ki artylli ki seng ka Jaiñtia Student Union (JSM) bad ka Hynniewtrep Youth Council (HYC) kila khot da ka jingïalang ban ïathir jingmut sani bha halor ka jingbym ioh kam ïoh jam ki samla kiba la pyndep ïaka line pule Automobile bad Civil Engineer haki kharkhana kiba don ha Rilum Jaiñtia.

Kine ki ar seng kila pynlong ia kane ka jingialang ha ophis treikam ka JSM ha Khliehmyntriang, East Jaiñtia Hills District haka 10 tarik une u bnai. Iaka jingialang la pyniaid da u Skhembha Dkhar Publicity Secretary JSM haka jingiadonlang ki spah ngut ki samla pule kynthei ban shynrang kiba dang wad kam naka kylleng ka Rilum Jaiñtia.

La pynlong ia kane ka jingiakynduh hadien ba ki nongialam jong kine ki ar seng kila ioh ka jingujor kumjuh ka jingtip a don haduh 130 haduh 150 ki samla kiba la pyndep ia ka kyrdan Automobile bad Civil Engineer kim pat ioh kam satia ha ki kharkhana kiba don ha Rilum Jaintia.

Na ka liang kitei ki samla kiba pyndep iaka engineer kila pynpaw ba ki shem jingeh ban ioh kam iohjam haki kharkhana kiba don ha Rilum Jaintia namar haba leit wad kam ne apply kam kine ki kharkhana ki pan iaka Experience Certificate bad kane ka jia haki kharkhana dewbilat.

U Shnalad Rymbai nongialam ka JSM u la ong ba kumba long mynta ki don haduh da ki spah spah tylli ki kharkhana tang East Jaintia, katba ha kine ki kharkhana kiba bun hi ki thung da ki nongtrei ki dei ki bar jylla, wat lada kine ki kharkhana shuwa ban buh iaki kharkhana kila kam ba kin ai kam iaki trai ri, hynrei mynta kila kyllain bad pan da ka Experience Certificate tang ban khanglad ïaki samla trai ri ban rung kam ha ki kharkhana.

Halor kane kine ki arseng kin nym shym kli kti bad kin wad ki lad ki lynti ban pynbor iaka sorkar khamtam iaki tnad ba dei peit iaki kharkhana ban thungkam iaki samla wad kam jam bad kiba la pyndep iaki jingpule haki kyrdan bapher bapher.

Ha kane ka jingialang la iadonlang u Eborlang Rymbai President HYC Khliehriat, ki nongialam seng kynthei ka JSM bad la rai ba kin shong jingialang biang ba iasyllok sani bha ban thaw da ka committee ban peit ia kane ka jingeh jong ki samla wad kam wad jam