Ym lar kam ka aiñ ba pynkup bor iaki Waheh Shnong ong ka BJP

Syllad | The Rising MeghalayaJune 11, 2020

Ka Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi, Sirdar and Waheh Shnong) Act 2015), ka dei ka aiñ kaba la pynkup bor iaka JHADC ban jied bad ai bor iaki waheh shnong ban treikam katkum ka samoi treikam ka jong ki, hynrei haka jingiakhun iaka khlam COVID-19 ka paw ba kane ka aiñ ka JHADC ka dei kaba ym larkam namar ba wat ka synjuk waheh shnong ruh kim shaniah haka sanad kaba kila ioh na ka konsil kaba pynskhem iaka jinglong waheh shnong jong ki.

Kane kala paw tynkrein haba u Deputy Commissioner jong ka West Jaiñtia Hills, Ma Garod LSN Dykes ula hap ban ishu ID Card iaki waheh shnong khnang ba kin ioh ka jingithuh kaba paka haba leit ba wan ban iakhun iaka khlam COVID-19.

Ka sorkar Jylla haka jingiakhun pyrshah iaka khlam COVID-19, ka la ong ba ki nongialam shnong ne waheh shnong ki dei ki briew kiba jan tam u paidbah bad ka donkam ka jingiatreilang jong ki haki shnong bapher bapher la pynmih ruh ki kyndon ba ki iarap iaka sorkar.

Pynban ka ain jong ka konsil, kaba ithuh iaki waheh shnong katkum ka sanad kaba ai iaki kam don bniat haei haei bad u DC u hap ban ishu iaka ID card khnang ba ki waheh shnong kin ioh ka jingithuh, ong ki MDC ka BJP ki ba treilang bad ka sorkar kaba NPP UDP ha JHADC.

“Ha kaba iadei bad ki ID card kadei ban ai da ka JHADC sha ki waheh shnong kiba la mynjur bad pynskhem lyngba ka sanad, bad da ka jingai ID card u DC, ka JHADC ka dei ban kyndit thiah noh khnang baka jingai ID card jong u DC kan nym long aiñ,” ong ki MDC BJP

Ki MDC ka BJP ba kynthup ia u Lakhon Biam, ma Dawan Lyngdoh kila dawa n aka executive committee kaba ialam u ma Thombor Shiwat kum u CEM JHADC ban pynbeit ia kane ka kam, khnang ba kan nym wanrah nuksa kaba sniew haka rukom pyniaid kam jong ka JHADC bad ka bor synshar district bad ban lait ka jingiatakhuh ha kaban pyntreikam iaka aiñ.

Kane ka ID card kadei kaba la shna hi da ka Synjuk ki Waheh Ri Jaintia bad katkum ki dak ki shin ka paw ba waheh shnong kiba la jied da u paidbah bad pynskhem da ka konsil kim don jingshaniah haka aiñ ka konsil.