Ym nud saham ka EC jong ka NPP-UDP halor ka jingshalan tuh ia u dewiong; ong u Andrew

Syllad | The Rising MeghalayaFebruary 15, 2025

U Kyrtong ka Voice of the People Party (VPP) na ka Jowai North Constituency Awhai Andrew Shullai u la ong ba ka executive committee kaba ialam ka NPP bad UDP ha Jaintia Hills Autonomous District Council kam nud ban saham ne kren eiei halor ka jingshalan tuh u dewiong kaba ka wanrah ia ka jingduhnong kaba khraw ha ka pla tyngka jong ka JHADC.

Ula ong ba tang khyndiat ngut kiba la khur spah ka phew jong ka Rilum Jaintia bad kane ka la wanrah ia ka jinghiar kaba jur ha ka ioh ka kot jong ka thaiñ.

Haba pan iaka jingkyrshan haka jingialang kaba long ha madan Marian haka 14 tarik Rymphang, ula ong ruh ba u la iasoh sha ka VPP namar ba u sngewiahap bad sngew iadei ki nongrim jong ka Party. U la ong shuh shuh namar u la shem ba ka jingpyndonkam ia ka pisa ha ka por eleshon ka ialam sha ka jingleh shiliang bad jingnoh shiliang hadien bala jop ia ka elekshon.

Haba ther tyngeh ia ka Executive Committee synroplang da ka NPP bad UDP, u Ma Andrew u la ong, ba ka JHADC ha ka jingshisha ka la dei ban dei ka tnat ba shimet bad kaba laitluid ne ka Autonomous body, hynrei mynta pat ka la kylla kum kawei ka tnat kaba rit jong ka Sorkar Meghalaya namar ka Executive Committee ka shu kohnguh beit katba hukum da ki kynrad jong ki Secretariat.

U MP ka Shillong Dr. Ricky AJ Syngkon haba kren ula ong ba ka VPP kam dei tang ka party tang ban iakhun iaka eleshon, hynrei kadei ka party ban pynkylla ban pynthymmai iaka pyrkhat pyrdain jong ki briew bad ban peh iaka bamsap ka Jylla

U Dr Syngkon ula ong ba ha ka jingiohi jong u ka jinghiar ha kam sain hima sima ha ka Jylla ka la sdang naduh u snem 2001 haba ka iing Dorbar thawain jong ka Assembly kaba don ha Khyndailad ka la pluh bad ka la iingkhong lut. U la ong shuh shuh ba ha kato jingpluh ym dei tang ka Assembly kaba la iingkhong hynrei la iingkhong lut ka jingkhuid jingsuba jong ka kam sain hima sima.

U la ong ba mynta la 24 snem na ka jingpluh katei ka Assembly hynrei haduh mynta pat ym pat shym la dep shna ia ka Assembly bad kaba sngew thumula ka long ba ka Dome jong ka iing Assembly kaba dang shna thymmai ka la kyllon bad hap bad kane ka pyni ba ka jingbamsap ka la sdang nala iing.