Ym pat ai jubab ka Assam halor ka jingleit jurip ia ki jaka ia kajia pud ha ka thain Langpih

Syllad | The Rising MeghalayaOctober 30, 2024

U Chairman ka Regional Committee ka West Khasi Hills, u Bah Paul Lyngdoh u la ong ba mynta ki dang ap ia ka jubab na ka sorkar Assam na ka bynta ban pynlong ka jingleit jurip ia ki jaka kiba don hapdeng ka jingiakajia pud ha ka thain Langpih hashwa ba kin aiti ia ka kaiphod kaba khatduh sha ka sorkar Jylla.

Haba kren sha ki lad pathai khubor ha ka 29 tarik u Risaw, u Bah Paul u la ong, “Ngi la pyrshang ban iakren bad ka Committee jong ka Assam. Nga la bthah ruh ia u Deputy Commissioner ka West Khasi Hills ba un iakren bad u DC ka Kamrup, hynrei kat haduh mynta ngim pat shym la ioh jubab satia. Ym shym la don kano kano ka jubab wat haka jingpyrshang kaba khatduh eh ban pynkut ia kane ka kam”

“Ngin sa aiti ia ka kaiphod kaba khatduh tad hadien ba ngi la pynlong ka jingleit jurip ia ki jaka kiba shah ktah. Ngi la aijingtip na ka bynta ban pyndep noh ia kane ka kam ha kine ki bnai tlang jong une u snem 2024. Kumta mynta ngi dang iai ap ia ka jubab na ka sorkar Assam,” u la bynrap.

Haba kylli, une u Myntri Sorkar u la ong ba ka Regional Committee kaba u la khlieh ka la dep ban aiti ia ki kot ki sla ha ka Assam na ka bynta ban pynshisha halor ka jingkam jong ka Meghalaya halor ki 54 tylli ki shnong kiba hap hapoh Langpih sector ha ka jingialang kaba khatduh kaba la long hapoh Hotel Pinewood.

U la ong, “Ngi la aiti ia kine ki kot ki sla. Ka jubab ka long kaba biang bad ngi donkam ban iaid lyngba satang ia kawei ka bynta, kata ban leit jurip ia ki jaka kiba shah ktah khnang ba ngi ruh ngin lah ban iakynduh ia ki nongshong shnong jong kito ki jaka kiba shah ktah.Ka dei tang kane ka kam kaba dang sahteng kaba ngi dang hap ia ka ban pyndep.”

Ka jingiashim, ai markylliang kan treikam ne em ha ka ban pynbeit ia kane ka jingiakajia, u Bah Paul u la ong, “Ngan ym lah ban ong ban ai ne shim namar baroh kan shong ha ki kyndon kiba ngi la dep ban ithuh kum ha ka jingiajan, ka histori bad kiwei kiwei.”