Ym pat don ba wan kam ia ka metiap u nongkhaii Bangladesh na Civil Hospital, Khliehriat

Syllad | The Rising MeghalayaAugust 29, 2024

Ia ka metiap jong u nongkhaii napoh Bangladesh uba dei ruh u General Secretary jong ka Bangladesh Chhatra League u Ishaque Ali Khan Panna kaba don mynta hapoh ka jaka buh metiap jong ka Civil Hospital Khliehriat, East Jaintia Hills ym pat shym la don satia ki ban wan kam.

U Superintendent of Police ka East Jaintia Hills lyngba u kyrwoh u pyntip ba ha ka janmiet jong ka 26 tarik Nailar la lapdien ia kawei ka metiap bym lah ban ithuh kaba la jan kem pyut marshiteng kaba thiah lyngktar hapoh ka jaka rep kwai ha ki bynta jong ka Dona Bhoi ka East Jaintia Hills District kaba jngai tang kumba 1.5 km na ka jaka khappud ka India-Bangladesh.

Une u heh pulit u la pyntip ba la lapdien ia kawei ka passport kaba don ia ka kyrteng Shri. Ishaque Ali Khan Panna na ka met jong u.

Hadien ba la pyndep ia ki jingdonkam baroh hapoh PO ia ka metiap la pynkynriah noh shapoh Civil Hospital Khliehriat na ka byna ban leh ia ka Post-Mortem bad hadien la buh noh ia ka met ha ka jaka buh metiap jong kane ka hospital na ka bynta ka jingpynithuh bad ka jngwan shimti. Ka jingtohkit ha kaba iadei bad kane ka bynta ka dang iaid shakhmat.