Ym pat don jingtyrwa ban wanrah medical college ha Jaintia Hills: Ampareen

Syllad | The Rising MeghalayaFebruary 19, 2024

Ka Myntri kaba khmih ia ka Tnat ka koit ka khiah, ka Kong Ampareen Lyngdoh haka 19 tarik Rymphang, kala pyntip ba kam pat shym la don satia kano kano ka jingtyrwa ban wanrah ia ka medical college hapoh ka thain Jaintia Hills.

“Nga kyrmen ba shisien ka sngi ngin sa iohi ia ka medical college ha Jowai. Ngam lah ban pynthikna ia kane ka jingkut jingmut namar ka dei ka kam kaba khraw shibun,” ong ka Ampareen haba jubab ia ka jingkylli ba la wanrah da u nongmihkhmat ka UDP na Mookaiaw, u Bah Nujorki Sungoh.

Da kaba pynpaw ka jingbym sngew iahap ia ka jingpynpaw jong u Sungoh ba ki jingtei kiba iadei bad ki jaka treikam ha ka koit ka khiah ki long ki bym biang bad kiba sniew shibun hapoh ka thain, ka Myntri ka la ong, “Ngi sngewthuh ba ki don ki jingsngewkhia halor kane ka bynta. Nga sngewthuh ba ngi donkam ban banbor, hynrei Nga la leit jurip sha kiba bun ki hospital bad ngi donkam ban trei kham bha bad kane kan urlong ha kine ki khyndiat bnai bad snem ki ban wan.”

Nalor kata ka la ong ruh ba shen na ka liang ka sorkar kan sa wanrah ia ka kor radiology kaba katkum kane ka juk hapoh Jowai civil hospital.

U Sungoh haba buh jingkylli ha ka kynta buh jingkylli hapoh ka iingdorbar Assembly u la pynpaw ka jingsngewkhia ha kaba iadei bad ki jingtei jong ka tnat ka koit ka khiah hapoh ka thain Jaintia Hills da kaba ong ka long ka bym biang nadong shadong.

Nalor kata u kyntu ruh ia ka sorkar ba ka dei ban wanrah da ka primary health centre (PHC) ha Psiar kaba don ha ka thain khappud ka jylla. Ha ka jingsngew ka jong u, kane ka shnong ka la dep lypa ban noh synniang ia ka jaka kaba haduh 4 akar khnang ban lah ban pynurlong ia kane.

Halor kane, ka Myntri ka la pynthikna ba na ka liang ka sorkar kan shimkhia halor kane ka jingtyrwa. “Kane ka jingkyrpad na ka bynta ka Psiar ka la wan. Na ka liang u MLA u la trei shitom bha bad ngi dang bishar bniah bad khmih la ka Psiar ka dei ne em ban ioh ia kane.

Shuh shuh ka Myntri ka la ban ruh halor ka jingdonkam ban pynthikna ha kaba iadei bad ka jingbiang ha ka jingdon jong ki nongtrei ha kiba bun ki jaka treikam ba la tei da ka sorkar. “Ngi dang khmih na ka bynta ban pyndap ia ki post na ka bynta baroh kiba kum kine ki jingtei,” ka la ong shuh shuh.