Ym pat lah aiti tohkit CBI halor ka jingjia shah siat iap ki riew paidbah ha Mukroh

Syllad | The Rising MeghalayaNovember 16, 2023

U Myntri Rangbah ka jylla u Conrad K Sangma haka sngi Palei u la ong ba kim pat lah satia ban aiti ia ka jingtohkit sha ka tnat Central Bureau of Investigation (CBI) ha kaba iadei bad ka jingjia shah siat iap jong ki riew paidbah ha ka shnong Mukroh kaba la jia ha ka 22 tarik u Naiwieng 2022 namar kin hap ban pyntreikam ia ka rai ba la shim da ka sorkar Assam bad Meghalaya.

Haba kren sha ki lad pathai khubor, u Sangma u la ong ba ka sienjam ka donkam ia baroh ki ar jylla ba kin soi ia ka jingialang hapdeng ki ar CM halor ki kam iapynbeit pud kaba la long ha ka 30 tarik u Nailur ba la lah.

 “Kumta ruh ka sienjam ka donkam ia ka por namar kaba shu kren da ka ktien, wat tang iwei i coma ruh i lah ban pynkylla ia ka jingmut jong kane ka jingialang bad kumta ka donkam ia kaban hap ban leh bniah bha. Ia kane ka sienjam hap ban leh noh mynta. Baroh ki ar CM ki la ia soi ia ka rai kaba mih na katei ka jingialang,” u la ong.

U la ong ruh; “Mynta ia kane ka sienjam ba pura jong ka jingiakren bdd ka jingshim rai ban aiti ia ka jingtohkit sha ka CBI sha ki commission bapher bapher bad sha ka sorkar India yn dang shim kam.”

Nalor kata u Conrad Sangma u la ong ruh ba ka jingialang ka la shim ruh ia ka rai ban weng noh ia ki bor pahara na ki jaka bapher bapher ha katei ka thain.

 “Ki don ruh kiwei ki bynta ha kaba ngin sakhi halor ka jingweng noh ia ki bor pahara da ki sorkar jylla ha ki jaka bapher bapher katkum ka jingdonkam, bad ngam kwah ban kren bniah halor kane ka bynta khamtam ha kaba iadei bad kito ki jaka kiba kham don jingsyier, ha kaba ngin iohi ba ka jingiakynad ka la duna shibun,” ong u CM.

Shuh shuh u Sangma u pyntip ruh ba u la iakren ruh bad u CM ka Assam u Himanta Biswa Sarma halor ka jingshim rai ban leit jurip ryngkat lang sha ka thain Block I bad ki bynta jong Khanduli-Psiar. U la ong ruh ba ka jingpynslem ka dei namar ki katto katne ki jingpynlong  ilekshon.

“Hadien ba la kut ki ilekshon, ngi khmih lynti ba ngin pynlong ka jingleit jurip ia ka thain Khanduli -Psiar kumjuh ia ka Block I ha kawei ka bynta hynrei ngin dang shim rai ha kaba iadei bad kiwei pat ki bynta,” u la ong shuh shuh.