Ym pat rai kut ka Sorkar halor ka jingthmu ban sangeh wanrah lynti Rel hapoh Rilum Khasi Jaintia

Syllad | The Rising MeghalayaOctober 11, 2023

U Symbud Myntri Rangbah ka Jylla ba khmih ia ka Tnad Transport, u Ma Sniawbhalang Dhar haka 10 tarik Risaw, ula ong ba na ka liang ka Sorkar ia mynta hi kam pat don satia kano kano ka jingmut ne jingthmu ban pynsangeh noh ia ka jingpynpoi lynti rel hapoh Rilum Khasi-Jaintia.

Une u Myntri haba kren sha ki lad pathai khubor ula ong “Haduh mynta hi ngim pat pynsangeh satia ia kane ka jingthmu kaba iadei bad ka jingwanrah ia ka lynti rel hapoh Rilum Khasi Jaintia, bad ngi dang shong bishar bniah halor kane ka phang”.

U la ong ruh ba ka project kaba iadei bad ka lynti rel hapoh Rilum Khasi Jaintia ka la ngat ha ka jingeh namar ka jingieng pyrshah jong ki kynhun bapher bapher kynthup ia ki Sengbhalang. Ula ong ba kane ka project ka kynthup ia ka lynti rel Tetelia-Byrnihat ba 22 Km bad ka Byrnihat-Shillong ba 108 Km.

Kumta ruh u la ong ba namar kane ka jinglong jingman na ka liang ka sorkar jylla ka la rai ban wad da kiwei pat ki lad ki lynti na ka bynta ban pyniasoh lynti rel, kata napoh East Jaintia Hills, hynrei ia kane ruh la ieng pyrshah jur da ki paidbah nongshong shnong jong ka thain.

Nalor kata une u Myntri u pyntip ruh ba ka sorkar haduh mynta kam pat shym la shim satia ia kino kino ki rai ha kaba iadei bad kane ka bynta, kata la kan pynsangeh ne pyniaid beit shakhmat ia kane ka jingthmu. Ia mynta hi u la ong ba ki donkam ban iakren shwa bad ki kynhun bapher bapher bad hadien kane kin sa shim ia ka rai.

Shuh shuh u la ong ba ka jingpyrshah ban pyniaid shakhmat ia kum kine ki project kin don beit. Hynrei u la ong pat ba ka dei ka kamram jong ka Sorkar Jylla ban pynshai paidbah halor ka jingkongsan ia ka lynti rel ia ka Jylla. Halor kane ka bynta u la ong ba na ka liang ki Deputy Commissioner kila pynlong ia ki jingialang pynsngewthuh paidbah na ka por sha ka por.

“Ngin dang bteng ban iakren bad ki kynhun bapher bapher, hynrei lada ki kyntait ngin hap ban pynsangeh noh ia ka” ula ong shuh shuh.