Ym pat weng iaka khyrdop khajna ka Karbi Anglong AC, dang ap pahara ki pulit Assam ha Khanduli

Syllad | The Rising MeghalayaApril 24, 2023

Shitaïew hadien ka jingwan buh ïaka khyrdop lum khajna bai rung ne Entry Tax da ka Karbi Anglong Autonomous Council (KAAC) ha Khanduli, West Jaintia Hills District, ka bor sorkar jong ka Assam bad KAAC kim pat weng iaka khyrdop bad iaki pulit na Khanduli.

Ki nongïalam jong ki sengbhalang bapher bapher kila hiar sha katei ka jaka bad kila ioh ka lad ban pynpaw iaka jingpyrshah jong ki halor katei ka khyrdop ha khmat ka Deputy Commissioner jong ka West Karbi Anglong District, Hamren, ka Krishna Baruah ha shnong Khanduli haka sngi Nyngkong.

Ki nongïalam sengbhalang kiba kynthup ïa u general secretary Jaintia Students Union u Treiborlang Suchen bad kiwei kiwei ki la pynpaw ha ka DC ba katei ka jaka ba wan buh khyrdop ka KAAC kan dang hap pura hapoh u pud u sam jong ka shnong Khanduli katba ym pat dep pynbeit pud pynbeit sam da ki sorkar jong Assam bad Meghalaya.

Shuh shuh u Treibor ula dawa ïaka DC ban weng noh ïaki pulit Assam bala buh ban ap pahara ha shnong Khanduli la shi taïew tam ha kane ka jaka. Ula bynrap bala lada la weng ïaka khyrdop lum khajna bai rung jong ka KAAC ka jingsuk ka la wanphai ha katei ka thain khappud Assam Meghalaya kaba iasam pud ka West Karbi Anglong bad ka West Jaintia Hills District.

Na ka liang jong ka Deputy Commissioner jong ka West Karbi Anglong ka la kular ban ïakren bad pynsngew sha ka KAAC halor ka jingpyrshah jong ki sengbhalang bad ka Dorbar Shnong Khanduli halor ka jingwan buh khyrdop haka shnong Khanduli bad ka jingdawa jong ki ba dei ban weng noh ïa katei khyrdop mardor.

Ka Deputy Commissioner ka la pynshai ruh ba jingbuh ïaki pulit Assam ha katei ka jaka ka long kaba shipor na ka bynta ban pynneh ïaka shongsuk shongsaiñ haka thaiñ.

Marsien wanphai biang ak shongsuk shongsain ha khappud West Jaintia Hills District bad West Karbi Anglong District shisyndon kan weng ia kitei ki pulit, la ong ka DC Hamren.

Ha kane ka sngi la ia don ryngkat u SP ka West Karbi Anglong nalor kiwei de ki heh pulit nalor ki Executive Magistrate ka West Jaintia Hills District.

Ha shwa ba ki sengbhalang bad ki nongïalam shnong ka Khanduli kin poi sha katei ka jaka bala buh ïaka khyrdop jong ka KAAC kala don ka jingïapyni bor hapdeng ki magistrate bad heh pulit bad ki sengbhalang hajan ka BOP Meghalaya.

Ki sengbhalang kila kwah ban leit tur bun ngut sha katei ka jaka hynrei ki magistrate bad ki heh pulit bad ki pulit kumjuh ki CRPF kila khanglad iaki sengbhalang bad la shah tang arphew ngut ban leit sha katei ka jaka bala buh khyrdop.

Shuh shuh shuwa katei ka jingleit tur sha katei ka jaka bala buh khyrdop da ka KAAC ka la don ka jingïalang paidbah ha madan phutbol Khanduli.

Ki nongkren kiba kynthup ïa u Treiborlang Suchen, u President ka HANM u L Kharbani, President KSU West Jaintia Hills u Laitphar Syngkrem nalor kiwei de kila pynrem ïaka KAAC kaba la wan buh ïaka khyrdop ha Khanduli bad ki la dawa ïaka KAAC ban weng noh mardor ïaka.