Ym patiaw ki nurse wat hadien ba phlei snam ka nongpang ha Civil Hospital, Nongpoh

Syllad | The Rising MeghalayaJune 10, 2024

Ha kawei na ki jingjia kaba wanrah ka jingsngewkhia kaba jur, kawei ka nongpang ha Civil Hospital Nongpoh, Ri Bhoi district kala phlei snam haduh ba ka jingthiah bad ka madan kala lyngkien da ka snam ha ka step jong ka 9 tarik mynta u bnai tang namar ka jingtorti jong ki nos (Nurse) kiba don duty ha katei ka por bad ki bym shym la patiaw wat hadien ba ka nongap kala pyntip sha ki bun bunsien.                      

Kane ka jingjia kala jia la ong ba ka la jia ha ka por 3 duna eiei mynstep, ha kaba ka nongap kaba dei ruh ka para jong katei ka nongpang ka la iohi ïa ka jinglyngkien ka snam bad mar mar kala pyntip sha ki nos ba don duty ha katei ka por, hynrei kaba sngew lyngngoh ka long ba ki nurse kim shym la patiaw.

Naka liang ka nongap pang kala ïathuh ba hadien ba kala pyntip sha ki nos kam don kano kano ka jingshimkhia na ka liang jong ki bad kim shym la sngap bad ai ñia pynban ba kam dei ban leh khyllung haba ka la don ha jaka sumar.

Kaba sngew lyngngoh ka long ruh ba wat ka jaiñ siang thiah kim shym la shimkhia ban kylliang wat hapdeng ka jingkhah jong ka snam hynrei hadien bun kynta bala poi da ki dkhot ka RBYF bad hadien bala don ka jingujor na ka liang ka seng ka la lap ruh ba ka jingbuh ïa u pipe ban ai drip ka long na shilliang jingthiah sha kawei ka kti kaba don sha kawei pat ka liang.

Halor kane ka jingjia na ka liang ka RBYF Nongpoh Circle hapoh ka jingïalam u Alberto Nongsiej  President haka sngi Nyngkong, kala leit ban ïakynduh syndon ïa ka Medical Superintendent ka Civil Hospital Nongpoh ban ujor halor katei ka jingjia bad ba dei ban shimkhia mardor ban pynlong ka jingtohkit bad ban leh da kaba tyngeh ïa ki nos kiba don duty ha katei ka por namar ka jingleh torti ha katei ka jaka sumar kam dei shuh kaba thymmai hynrei kaba la ju jia na ka por sha ka por.