Ym pdiang ka KSU ia ka jingkular ka Sorkar da ka ktien, kyntu ia ki 60 MLA ban kyntait ia ka MSIPF

Syllad | The Rising MeghalayaMarch 12, 2025

Ka Khasi Students’ Union (KSU) haka 11 tarik Lber ka la kyntait ban pdiang ia ka jingkular jong ka sorkar da ka ktien bad kyntu ia baroh ki 60 ngut ki MLA ba kin kyntait ia ka Meghalaya State Investment Promotion and Facilitation Act, 2024, kaba thmu ban thied jaka na ka bynta ban ai wai sha ki nongseng kam shimet, kumba ka long mynta ha kane ka dorbar Mang Tyngk kaba dang iaid jong ka iingdorbar thaw ain.

Kane ka la wan long hadien ba ki nongialam ka KSU ki la wan iashim bynta ha ka jingialang ba la khot pynlong da u Myntri Rangbah ka Jylla u Conrad K Sangma ha ka jingiadon lang u Symbud Myntri Rangbah u Bah Prestone Tynsong bad u Chief Secretary ka Jylla u Bah DP Wahlang hadien ka jingleit tur jong ka seng sha ka iingdorbar.

Na ka liang ka sorkar ka la kular ban wanrah ia ki jingpynkylla kiba donkam ha ka MSIPF Act 2024, bad ban shna ia ki kyndon ha ka sien shong dorbar ka ban wan jong ka iingdorbar thaw ain hadien ba la dep iasyllok bad baroh ki kynhun bapher bapher.

“Ngim pat sngew hun ia ka jingmih na ka jingialang kaba neh tang kumba shikynta shiteng. Ngi pyntip sha ka sorkar ba ki jingkular kiba tang da ka ktien ka dei kaba ngim lah ban pdiang namar ngi dang don ka jingsngew artatien, bad lada ailad ia ka Act ba kan long kumne kumba ka long dei ban pynduh pyndam noh mardor,” ong u samla Donald V Thabah, General Secretary ka KSU haba kren sha ki lad pathai khubor hadien ka jingialang.

U la pyntip ruh ba ka Central Executive Committee (CEC) jong ka KSU kan sa shong jingialang shen ban rai halor ka sienjam kaba bud ha kaba iadei bad kane ka phang.

Haba kyntu ia baroh ki 60 ngut ki MLA ba kin kyntait ia ka MSIPFA, 2024, u samla Donald u la ong, “Ha kane ka khyllipmat baroh ngi dei ban kyntait noh ia ka Principal Act jong ka MSIPFA, 2024.Ka long kaba kongsan ia ki MLA riewlum ba kin kren na ka bynta ki paidbah haba wanrah ia kane ka Bill hapoh ka iingdorbar.”

“Ngi la dep ban phah ia ka dorkhas sha baroh ki 60 ngut ki MLA bad mynta ka shong satang ha ki,” u la bynrap.

Une u nongialam ka KSU u la ong ruh ba ka jingtyrwa ban wanrah ka jingpynkylla ha ha MSIPFA kim pat biang stia ban aijingiada ia ka hok jong ki riewlum kiba dei ki trai muluk ka jylla.

“Kumta, ngi ban jur ia ka sorkar ba dei ban pynduh pyndam ia kane ka Act shwa lada ka pynmyntoi tang ia ki nongseng kam ym ia ki paidbah ka jylla,” u la bynrap.