Ym shngaiñ shuh ka leit ka wan ki paidbah lyngba ka jingkieng Lakroh: KSU

Syllad | The Rising MeghalayaMarch 26, 2021

Ka Khasi Student Union (KSU) War Jaintia Circle kala ong ba ka jingkieng Lakroh kaba pyniasoh ia bun tylli ki shnong ha khappud India Bangladesh kala don haka jingma bad ka donkam ban maramot kyrkieh namar ba kala jingjot rathai ban shngaiñ ka ïaid ka ïeng ki paidbah.

Ka KSU hadien ba kala ïoh pdiang ïaki jingujor na ki paidbah halor katei ka jingkieng haka 26 tarik une u bnai hapoh ka jingïalam u Publicity Secretary u Michel Platini Mukhim bad Vice President KSU Amlarem Area Unit Ram Khyriem ryngkat u Organising Secretary Leningrad Tariang ki la hiar jurip ïa katei ka jingkieng.

Ka KSU haka jingjurip ka la lap ba katei ka jingkieng ka long kaba la jot rathai bad kam long shuh kaba shngain ia u paidbah nongleit nongwan lyngba katei ka jingkieng da ki kali motor namar ba ki dieng bad ki lyntang ba siang ha kane ka jingkieng kila pyut.

Ki shnong ba iaid lyngba kane ka jingkieng ka kynthup iaka Jaliakhola, Sankhat bad ka shnong Hawai Bhoi bad kiwei kumjuh ki shipai iada khappud BSF.

Haba ïadei bad kane, ka KSU War Jaintia Circle kala kyntu iaka sorkar lyngba ka tnad PWD ban maramot mardor ia kane ka jingkieng ban suk u paidbah ban iaid ban ieng khamtam bala jan poi ka aiom lyuir.