Ym treh wanphai ïing ki samla pule ka Meghalaya ban pynneh jingiatylli ki thain Shatei Lammihngi

Syllad | The Rising MeghalayaAugust 30, 2019

JOWAI: Ki samla pule jong ka ICFAI University Agartala na ka jylla Meghalaya ki la rai ban nym wanphai ïing kum ka dak ban pyni ka jingiatylli bad kiwei pat ki samla pule na ka thain Shatei Lammihngi katba ki bor pyniaid jong ka ICFAI ki la kam ba ka shongsuk shongshngain ka la wanphai biang ha University.

Kumban shu pynkynmaw hangne ba ka jingiakynad kala sdang na ka daw jong ka jingshah leh kynshlein kawei ka samla pule ha u samla ba na ka jaidbynriew Bengali hi, hynrei lawan iarap ia katei ka samla pule da ki samla pule jong kiwei ki jylla ka thain Shatei Lammihngi.

Katei ka jingiakynad hapdeng ki samla pule Bengali bad ki samla pule na kiwei ki jylla jong ka thain Shatei Lammihngi ka la jur haba kumba 300 ngut ki samla pule Bengali ki la wanhiar thma ha ka Sngi Ba Ar ha ka jaka pule ICFAI Agartala haba ki la pynjulor ia ki jaka sah bad ki kali kynthup kawei ka Eco Sports bad Jeep Compass ba dang thymmai jong uwei samla pule na ka Jylla Meghalaya bad Mizoram.

Ka kynhun tohkit bala phah da u Chief Minister ka Jylla ha ka jingialam jong u Deputy Inspector of General of Police ryngkat bad ki kmie kpa jong katto katne ngut ki samla pule ki la poi ha Agartala mynta ka sngi bad ki la iakynduh ia u Pro Vice Chancellor jong ka ICFAI U Bipab Hader.

Hadien ka jingiakynduh jong katei ka kynhun bad u Hader la rai ban shah ia ki samla pule na ka jylla kiba long 17 ngut ban leit phai sha la iing la sem.

Hynrei ki samla pule jong ka jylla ki la rai ban nym leit phai namar la shah tang ia ki ban leit phai iing ym ia baroh ki samla pule na ka thain shatei lam mihngi bad kum ka dak jong ka jingiatylli ki samla pule na jylla ki la rai ban sah beit ha university.

Ha ka kyrwoh bala pyllait da ka ICFAI, la iathuh ba ka University ka la shim ia ki lad ki lynti kiba donkam ban pynthikna ba ka shongsuk shongshngain kan wanphai biang ha katei ka jaka pule ha Agartala bad la bteng biang ia ki klass naduh mynta ka sngi.

Ka University ka la shim ia ka jingkitkhlieh kaba pura ban pynthikna ia ki lad jingiada ba pura ia ki samla pule bad ka la ioh ia ka jingkyrshan kaba radbah na ka Sorkar Tripura ban pynthikna ba kan nym don kano kano kaba sniew kaba jia ia ki samla pule jong katei University.