Yn aiti sha ka Company kaba biang tam na ka bynta ban pyniaid ia ka jingshakri ka 108 Ambulance

Syllad | The Rising MeghalayaNovember 7, 2023

Ka Myntri ka Tnat ka koit ka khiah ka sorkar jylla ka Kong Ampareen Lyngdoh haka 6 tarik Naiwieng kala ong ba na ka liang ka sorkar kan aiti sha ka Company kaba biang tam na ka bynta ban pyniaid ia ka 108 Emergency Service hapoh ka Jylla khnang ba kan lah ban ai ia ka jingshakri kaba paka.

Haba kren sha ki lad pathai khubor, ka Myntri kala ong “Ngin ym shah ialam bakla ha ki jingiapynksan jong ki Company kiba iaknieh ban ioh pyniaid namar ngi don hangne ban jied ia kaba bha na kaba bha tam namar ki jingkynnoh, ki jingiapynksan kin ym lah ban pynbeit iaki jingeh”.

Nalor kata na ka liang ka Myntri ka la ong; “Ka bynta ka jong ngi ka long ban ai ia ka jingshakri kaba biang tam lyngba ki ambulance na ka bynta ki paidbah nongshong shnong ka jylla Meghalaya. Ka 108 kala shah mad ia ki jingtynjuh kiba bun ha ki snem bala leit noh bad ngam kwah ban ia don bynta ha kum kine ki kam ka ban ktah ia ka Sorkar.”

Shuh shuh ka la ong ruh ba ka jingkyrpad ka jong ka ia ki Company ba kin khmih ia la ka jong ka discipline bad ban ap na ka bynta ban pyndep ia ki kyndon kiba donkam ban leh, kata da kaba kyntu ruh ba kim dei ban leit sha ki lad pathai khubor da ki jingujor hynrei ban wan sha ka jingiakren lyngba ka committee kaba pyniaid ia ka tender.

Ha kajuh ka por ka Myntri ka la kyntu ruh ia ki kompeni ba kin kiar ban pynmih kino kino ki jingpynklumar jingmut ha kaba iadei bad ka rukom jied ia ka kompeni ka ban pyniaid ia kane ka kam namar kan don ka jingbihsar bniah ka bym don kano kano ka jingshah liang.