Yn ap u Bah Ardent iaka jingpynbna ba thaw ka sorkar iaka Expert Committee halor ka Reservation Policy

Syllad | The Rising MeghalayaMay 31, 2023

Ka long ka khubor kaba lam sngewtynnad ia u paidbah Khasi Jaintia bad khamtam iaka party Voice of the People Party (VPP) kaba kila lah ban pynbor iaka committee ba thymmai on Reservation Roster bad ka Reservation Policy jong ka jylla ban thaw iaka expert committee halor ka Reservation Policy ha ka sngi Balang.

Kane ka jingialang kaba long ha main Secretariat bad kala neh haduh lai kynta. Ia kane ka committee la khlieh da ka Kong Ampareen Lyngdoh Myntri ba dei peit iaka kam aiñ ne Law.

U Dr Ricky Syngkon ula ong “Ngi slem ban wan na ka jingialang ba ngi ieng haka nongrim ban dawa ba donkam ban thung da ka expert committee ban review iaka reservation policy kaba ngi ba ka don ka jingduna bad jingdkhoh.”

Ula ong ka rai ka long ba kane ka committee kan ong iaka sorkar ban thaw iaka expert committee. Ula ong ruh ha ha kane ka jingialang ka committee kala bthah ruh iaki nongialam seng sain pyrthei ban phah iaki jingai jingmut hapoh ka 15 tarik Jylliew halor ka jingpyntreikam iaka Roster System bad halor ka jingpynbeit iaka ka Reservation Policy.

Hadien kane ka committee kan sa shong biang ka jingialang ban pyrkhat kumno ban iaid shakhmat.

U bah Ardent haba kren hadien bala wai ka jingialang ula ong “Ngi la jop, hynrei ngim dei ban hun bad dei namar kata ka daw bad na kaliang jong nga lymda ngi ioh da ka jingthoh kaba shai baka sorkar kan thaw iaka expert committee, ngam pat sangeh iaka jingshah thngan jong nga.”

“Lada ka sorkar ka kwah ban pynkut noh ia kane ka jingshah thgngan ne ka jingiakhih ka sorkar ka dei ban pynsted noh ban phah iaka jingpynbna bala thaw iaka expert committee halor ka Reservation Policy,” la ong Bah Ardent.

Ka kong Ampareen Lyngdoh chairperson hadien bala kut ka jingialang kala don ka jingiamir jingmut kaba sani bha bad baroh kila ai jingmut bad ym baroh kita ki jingai jingmut la iahap jingmut lut ki sain seng pyrthei.

Ka la ong ba ha kane ka jingiakren kumba long ba imat baroh ki seng sain pyrthei ki kwah ban don bynta lang ban iakren ban pynkylla ne pynbeit iaka Reservation Policy.

Ka committee kala bthah ruh iaki seng sain pyrthei ban wanrah iaka jingthoh ban pynshisha balei ba donkam ban review iaka Reservation Policy ban lait na kino kino ki kynrum kynram.

Kala ong ba ki don ki seng sain pyrthei ki ba ym shym la lah ban rai bad ki la ong ba kin iakren shuwa haki party lajong ban pan jingmut la yn thaw iaka expert committee, la ong ka Kong Ampareen bad bynrap ha kaba kut ka jingiakren kalong kaba seisoh bad ki don katto katne ki jingkylli halor ka Roster bad kaei ka jingeh lada pynkylla iaka Reservation Policy bad don kiba kwah pynbeit iaka Office Memorandum jong u snem 2022 halor ka para D jong ka Roster.

Ka Kong Ampareen kala ong ba kaei kaba rai mynta ka sngi yn phah baroh sha ka sorkar bad kyrmen ba baroh ki seng sain pyrthei ki ia hun.