Yn bei tyngka ka sorkar Jylla sha ki 20 hajar ngut na ka bynta ban seng ia ki kam lajong

Syllad | The Rising MeghalayaFebruary 10, 2024

U Myntri Rangbah ka Jylla u Conrad K Sangma ha ka sngi Thohdieng ba la lah u la ong ba na ka liang ka sorkar ka la pynkhreh ia ka mission ban kyntiew halor ka jingseng ia ki kam ki jam lajong ha ka jylla, kata da ka jingkyrshan pisa sha ki palat 20,000 ngut na ka bynta ban seng ia ki kam ki jam lajong lyngba ka jingiarap kaba hap hapoh ka  CM-Elevate.

“Kum ka sorkar, ngi ngeit ba ka roi ka par jong ka ri, jylla kan urlong tang lyngba ka jingkyntiew ia ki jingtreikam Lajong bad ha ki jingtreikam ba shimet ne private sector,” ong u CM haba aijingkren ha ka PRIME MeghaPreneur Expo ha Shillong.

“Ka bynta jong ka sorkar ka long khamtam ban plie ia ki lad ki lynti, ban pyntreikam ia ki polisi, ban kyntiew ia ki kam karkhana bad ban khmih ia ka jingiaid shakhmat ha ki Lajong.Ngi don ia ki rukom treikam kiba shai, kata da kaba pynleit jingmut ban kyntiew ia ki kam lajong kum Kawei na ki lad ioh kam ioh jam ha ka jylla,” ong u Conrad.

Haba aiti ia ki cheque sha ka kynhun kaba nyngkong jong ki nongseng kam lajong kumjuh sha ki kynhun Seng kam bad ki seng kiba treikam hapoh ki shnong ki thaw ia kiba la jied hadien ka jingbishar bniah shwa ka jingpyllait ia ka jingiarap pisa hapoh jong ka CM-Elevate, na ka liang u CM u la ong; “Ngi kwah ban thaw ia ka kolshor ka ban kyntiew ia ki kam lajong.Ngi kwah ba ki samla jong ngi ba kin shim ia ka rai bad ban shim ia ka kabu kaba ki ioh pdiang hapoh ka jylla.”   

Da kaba pynbna ia ka CM-Elevate kum ka prokram kaba kongsan tam ban kyntiew ha kaba iadei bad ki lad Seng kam lajong hapoh ka ri, u CM u pyntip ruh ba na ka liang ka sorkar ka plie ia ki lad ki lynti na ka bynta ki samla ba kin wan shakhmat lyngba kino kino ki jingtyrwa kiba hap hapoh jong kane ka skhim. “Kum ka sorkar ngi bteng ban aijingkyrshan Halor ki jingtyrwa lyngba ka jingiarap pisa kaba haduh 75% bad ban iarap ruh ia ki ha kaba iadei bad ki tiar ki tar bad kiwei pat ki jingkyrshan khnang ban pynthikna ba ka kam kan iaid shakhmat,” u la ong.

Shuh shuh u la ban ruh ba ha kine ki 3-4 snem ki ban wan na ka liang ka sorkar kan aijingiarap sha haduh kumba palat 20,000 ngut kiba kwah ban seng ia ki kam lajong bapher bapher ha ka jylla.U la ong ba ka sorkar ka la pynkhreh haduh kumba T.300 klur na ka bynta kane ka skhim.

“Ka jingthmu ba kongsan jong kane ka skhim hi ka long ban pynthikna ba ki samla jong ngi kin ym shaniah tang ha ki kam sorkar hynrei ban phaikhmat sha kiwei pat ki lad ki lynti lyngba ki kam lajong.Ka jingkyntiew ia ki kam lajong kan lah ruh ban plielad shibun ha ka liang ka ioh kam ioh jam,” ong shuh shuh u CM.

Ki la ong haduh jan kumba 40 ngut ki nongioh jingiarap lyngba ka CM- Elevate ha katei ka prokram kaba la long ha ka sngi Thohdieng ba la lah na ka bynta ban shna ia ka multipurpose swimming pool bad gym, futsal ground bad basketball court.

Kumjuh ki nongioh jingmyntoi lyngba kiwei pat ki skhim bapher bapher kiba dei shibynta jong ka CM- Elevate ki kynthup ia ka jingiarap pisa lyngba ka Meghalaya Agriculture Warehouse Scheme, Meghalaya Community Facility Centre Scheme, Prime Agriculture Response Vehicle, Meghalaya Tourism Vehicle Scheme bad Meghalaya Motorcaravan Scheme.