Yn bei tyngka ka sorkar sha 50 ngut ki riew shemphang ban wad bniah ia ka kolshor bad histori ka Meghalaya: CM

Syllad | The Rising MeghalayaMarch 9, 2024

U Myntri Rangbah ka Jylla u Conrad K Sangma ha ka 9 tarik Lber u la pynbna ia ka rai ka sorkar ban bei tyngka na ka bynta 50 ngut ki riew shemphang ha ki kam wad bniah ba kin pynlong ka jingwad bniah ha kaba iadei bad ka kolshor bad ki bynta bapher bapher kiba iadei bad ka histori jong ka Jylla.

Haba kren ha katei ka sngi pynkut ia ka ‘Monolith Festival’ ne ka Tamasa Tynrai ka KHADC ba la pynlong hapoh Khasi Heritage Village ha Mawphlang, u Sangma u la ong ruh ba ka sorkar kan iaid bteng ban ai ka jingkyrshan ia baroh ki laitylli ki District Council ha ka Jylla.

“Nga sngewkmen ban pynbna ba hapoh ka jingialam jong u Bah Paul Lyngdoh Myntri ka Tnat Arts and Culture, ngin sdang ia ka prokram ba la tip kum ka CM’s Research Scholarship Programme ha kaba man la ka snem ngi iarap bei tyngka 3 lak na ka bynta iwei pa iwei ki riew shemphang bad riew wad bniah, bad ka sorkar kan iarap na ka bynta haduh 50 ngut ki riew wad bniah man la ka snem ba kin leh ia ki kam wad bniah ha kaba iadei bad ka kolshor ka jong ngi bad ha bynta bapher bapher kiba iadei bad ka histori ka jylla,” u la ong.

Halor kane u CM u la ong ba kin thaw da ka committee ha kaba kin bishar bniah ia ki nong aplai bapher bapher kiba trei shitom ki ban iatreilang ryngkat ryngkat bad ka sorkar na ka bynta kine ki kam wad bniah.

Haba phai sha kane ka tamasa, u CM u la ong ba la pyniapher ia kino kino ki kynhun bynriew lyngba ki kolshor. U la ong ruh ba ka dei ka kamram jong ka sorkar ban aijingiada, ban pynneh pynsah bad ban kyntiew ia ka kolshor bad ka tynrai jong ka jaidbynriew. U la ong ruh, “Ngi dei ban don ia ki iew tynrai ki ban treikam man la ka sngi khnang ban pynkynmaw ia ka jingpynithuh bad ia ka jingriewspah jong ka kolshor bad ban pynpaw ruh sha ka pyrthei.”

Katba u Myntri ka Tnat Tourism u Bah Paul Lyngdoh ha ka jingkren u la pynpaw halor ki laitylli ki bynta kiba pynkhlain ia jaidbynriew trai shnong riewlum, kata ka jinglong trai ia ka Jaka, ka Jinghiar pateng bad ka Ktien.

Ha kane ka sngi kut jong ka Tamasa la sakhi ia kiba bun jait ki bynta kiba pynpaw ia ka tynrai jong ka jaidbynriew, kata naduh ki jingshad tynrai kiba kynthup ia ka Shad Phap Kwiar, Shad Kiewiing, Shad Ksing, Shad Kyntud, Shad Ot Syier, Shad Shoh Kba, Shad Pdiah, Shad Kynrup Khla, Shad Phor bad kiba bun kiwei pat ba la iashim bynta da ki Hima bapher bapher.

Nalor kata la sakhi ruh ia ki jingtem jingput bad ki jingrwai tynrai na ki kynhun bapher bapher kiba kynthup ia ki Sur Ksing na Lyngngam, Ahaia, Pynshailang Lyngdoh Mawphlang, Lily Sawian, Na u Bnai, Benedict Hynniewta, Dalariti, bad Summersalt.      

Na ka liang u dkhot ka Karbi Anglong Autonomous Council, u Abhijit Kro u la ong ba ka dei ka sien kaba nyngkong ba u la wan ban iashim bynta ha kane ka tamasa bad pynpaw ruh ba ki don ki Khasi kiba shong ba sah ha Karbi Anglong.U la ong ruh ba kin sa ai jaka ruh na ka bynta ban tei ia ka Khasi guest house hapoh Diphu.