Yn bishar bniah ka sorkar jylla halor ka jingduna ki doktor specialist bad ia ki jingtreikam ki hospital

Syllad | The Rising MeghalayaNovember 7, 2023

U Myntri Rangbah ka jylla u Conrad K Sangma 6 tarik Naiwieng u la khot ia ka jingialang bishar kam ha kaba iadei bad ka jingduna ki doktor specialist bad halor ki jingtreikam jong ki Civil hospital bad halor kiwei pat ki mat kiba iadei bad ka tnat ka koit ka khiah.

Haba kren sha ki lad pathai khubor, ka Myntri ka Tnat ka koit ka khiah ka Kong Ampareen Lyngdoh ka la ong ba ka jingpynlong ia kane ka jingialang ka long khamtam ban bishar bniah ha kaba iadei bad ki jingtreikam jong ki Civil Hospital bad ki District Hospital ha ka jylla hi baroh kawei. Ka la ong ba na ka liang ka sorkar ka la bishar bniah ia ka jinglong jingman, ia ki jingtreikam bad halor ki jingdonkam ia ki jingtei ia ki jaka treikam.

 “Ngi la ai por ialade kumba 24-36 bnai khnang ba ngin peit bniah ha kaba iadei bad ki jingtreikam,” ong ka Myntri. Ka la ong ruh ba ki jingdonkam kiba kongsan tam hapoh ki hospital sorkar ka long halor ka jingdon ki nongtrei.Ka la ong ruh ba ki la pyntip sha u Myntri Rangbah ka jylla ha kaba iadei bad ka jingduna jong ki nongtrei kumjuh ki doktor specialist bad ki doktor.

 “Ngin dang ap mynta na ka bynta kawei pat ka jingiakren bad u Myntri Rangbah khnang ban peit ia kiwei pat ki kam kiba hap ban shimkhia bad kaei ka jingiarap song pisa kaba donkam ba ka Sorkar kan ai khnang ban pynthikna ba ki lad jingsumar jong ngi kin long kiba kham biang” kala ong.

Nalor kata ka Myntri ka la ong ruh ba na ka liang ka Tnat ka la phah ia ka jingtyrwa halor kumno ban pynthikna ba ki doktor specialist kin pyniasoh ia lade na ka bynta ka jingshakri hapoh ki jaka sumar sorkar hapoh ka jylla.

“Ngi dei ban don ia ki sienjam ban khmih halor ki jingsiew bad ba ki heh ba dei khmih mynta kin pyrkhat bniah halor ki jingytwa kiba bun lane ki lad jingtyrwa na ka bynta kine ki specialist khnang ba ngin lah ban pyndap ia baroh ki jaka kiba thylli ha ka thup jong ki specialist,” ong shuh shuh ka Myntri.

Shuh shuh ka pyntip ruh ba na ka liang ka sorkar ka la shim ia ka rai ban pyntreikam ia ka policy ban pynthikna ba baroh hapoh ka tnat ka koit ka khiah ki dei ban shah pynkynriah sha kino kino ki jaka na ka bynta ban aijingshakri.

Ha kawei pat ka bynta ka Myntri ka la ong ba na ka liang ka sorkar kan wad bniah ruh ia ka daw tynrai halor ka jingmlien jong baroh ki hospital sorkar ban phah pynkynriah ia ki nongpang sha kiwei pat ki jaka sumar.