Yn bishar bniah ka UDP shwa ban shim ia ka rai kaba khatduh halor u kyrtong na ka bynta ka ilekshon MP

Syllad | The Rising MeghalayaNovember 20, 2023

Ka State Election Committee jong ka Seng United Democratic Party (UDP) kala iakynduh haka sngi Nyngkong bad rai ban pynlong da ka jingbishar bad thir bniah hashwa ban shim ia ka rai kaba khatduh ha kaba iadei bad ka kyrteng jong u kyrtong u ban mih ia aireng ha kane ka ilekshon Lok Sabha 2024.

Na ka liang u Vice President ka UDP u Bah Allantry F Dkhar ula ong “Ngi la sdang ban pynlong ia ka jingbishar bad thir bniah shwa ba ngin shim ia ka rai, bad kane ka jingiathir bniah ka long na ka bynta ban ioh ia ki kyrtong kiba biang tam.”  Nalor kata u la ong ruh ba kane ka jingiamir jingmut kan sdang mardor lyngba ki president bad secretary jong ki district nalor ki dkhot bad ki nongtrei jong ka party.

Halor kane ka bynta u la ong ruh ba la ai por ia ki president jong ki district shitaiew ba kin pyndep ia kane ka bynta bad ban ai jingtip mardor sha ka SEC ka ban sa shong bishar bad ai ia ka rai kaba khatduh hadien ba kan sa don ka jingiashong syllok kaba kham janai hapoh ka Regional Democratic Alliance (RDA).

Hynrei na ka liang u Bah Bah Allan ula kyntait ban iathuh ia ka kyrteng jong ki briew bala pan ticket ban iakhun na ka Shillong Seat bad ong “Ki don saw ngut kiba la pynpaw ia ka jingkwah ban iakhun n aka party hynrei ngim pat pynpaw satia ia ka kyrteng jong ki.

Haduh mynta hi lah ban kdew ba ki don laitylli ki kyrteng kiba la paw halor ka jingangnud ka jong ki ban ioh iakhun na ka seng UDP ha kane ka ilekshon Lok Sabha ka ban wan napoh Shillong Seat, bad kine ki kynthup ia u MLA barim ka Mawlai, u Bah PT Sawkmie, u President barim ka seng HYC u Bah Robertjune Kharjahrin uba la wan pyniasoh dang shen sha ka UDP bad u President ka Khasi Author Society (KAS) Dr DRL Nonglait uba la pynkhreh ban wan pyniasoh shen sha kane ka party.