Yn bishar thymmai ka Sorkar ia ka bond policy namar ka jingkyrduh doktor ha ka Jylla

Syllad | The Rising MeghalayaJuly 10, 2024

Ka Sorkar Jylla ka la shim ia ka rai ban bishar thymmai biang ia ka bond policy ne ka jingiateh soskular bad ki samla ba leit pule doktor khnang ban lah ban weng ia ka jingkyrduh doktor ha ka Jylla.

Ia kane la pyntip da ka Myntri ka Tnad ka koit ka khiah ka Kong Ampareen Lyngdoh ha ka 9 tarik mynta u bai hadien ka jingialang bad ka kynhun ki nongmihkhmat na ka Khasi Students’ Union (KSU), kiba la kyntu ia ka jingtuklar lem jong ka khnang ban pynthikna ia ka jinglong khuid ha ka rukom ai bhah sha ki samla pule doktor na ka bhah ka Jylla.

“Balei ba na ka snem sha ka snem ka jingdon jong ki medical seat ka la nangkiew na ka bynta ki samla pule ka Meghalaya, hynrei balei ba ngi dang don ka jingduna doktor kaba jur? Kumta ngin sa shong bishar thymmai ia ka bond policy. Ngin sa shong bishar thymmai ia baroh kine ki kam ba kongsan ban pynthikna ba ki doktor kiba ioh ia kane na ka Jylla Meghalaya ki dei ban wanphai pat sha Meghalaya,” ong ka Kong Ampareen haba kren sha ki lad pathai khubor.

Nalor kata ka Myntri ka la ong ruh ba na ka liang ka tnad ka dang iakren bad ka Tnat Ain ban shong bishar bad khmih biang ia ka bond policy khnang ban pynthikna katba lah ba ki doktor jong ngi bad ki samla pule kin wanphai pat ban aijingshakri ia ki nongshong shnong ka Jylla.

Ka la ong ruh ba la slem bha ki doktor kiba pass na ka bhah ka Jylla la iohi ba kim shym la wanphai shuh sha la Jylla, kumta ruh ngi hap ban khmih bniah halor kane bad ngi kyrmen ba kumba ngi iohi ia ka jingbun ki jingiakhun ban ioh leit pule MBBS na ka bhah ka Jylla, ka dei ban don ruh ka jingkitkhlieh ban wanphai shapoh ka Jylla,” ka la ong.

Katkum ka jingpynpaw ka jong ka, ka jingioh bhah ka Jylla na ka bynta ban leit pule MBBS ka la nangkiew ha kaba ka Jylla ka la ioh haduh 94 seat ha u snem 2023. “Ngi kyrmen ruh ba kane ka jingioh seat kan nangkiew shuh shuh ha ki snem ki ban wan,” ka la bynrap.

Watla katta ka Myntri ka la ong “Ngi kyrmen ba hadien ba ka iingkashari kan ai jingmynjur ia ka Sorkar India ban sdang ia ka NEET counselling, kumta ruh ngi kyrmen ba ha kata ka por ngin sa don ha ka jaka kaba kham biang (kata ka jingbun jong ki seat ba la mang na ka bynta ka Meghalaya) ha kaba yn lah ban leh ia kaba donkam ban tuklar khnang ban pynthikna ba la shimkhia halor baroh kine ki mat.”