Yn bteng ka jingiakhih dawa ILP da kaba jai jai ha Jylla ong u Lambokstar

Syllad | The Rising MeghalayaDecember 7, 2020

Ka jingiakhih ban dawa pyntreikam iaka Inner Line Permit (ILP) haka jylla kan bteng da kaba jai jai namar ka jingsar ka khlam COVID-19 ong u Lambokstar Marngar, president jong ka Khasi Students’ Union (KSU).

U Lambokstar Marngar ula ong ia kane haba kren haka jingialang pynskhem iaki unit bad ki dkhot kiba thymmai jong ka KSU Khliehriat Circle, kiba kynthup iaka KSU San Shnong Unit, Ladrymbai Unit bad Khliehriat Town Unit haka jingialang kaba long ha madan Teilang Phawa Stadium, Dkhiah haka sngi Saitjain ka taiew kaba la dep.

Ula ong ki samla ka jaitbynriew ki la tyrha bad dukha mynsiem namar ka jingthombor jubor jong ka sorkar Jylla ha kaba bun ki samla ki la rung along haba ki pyrshang ban kren ïaka hok bad ka jingshisha na ka bynta ban ïada ïaka jaitbynriew bad haduh mynta ki dang rynjaiñ ki case ba ki kit na ka bynta ka dawbah dawsan jong ka ri bad ka jaitbynriew baroh kawei.

“Kane ka skul bah jong ka sorkar nangne shakhmat kan nang pynrhem ïaka mynsiem ïeid ri ka jong phi ki samla bad ngam juh ong ba kadei ka ïing Byndi ne Phatok hynrei kadei ka skul bah jong ka sorkar na bynta kito ki samla kiba shlur kiba la aiti bad len lade na ka bynta ka dawbah jong ri bad ka jaitbynriew”, ong u Lambokstar.

Ha kaba ïadei bad ka jingong jong ki nongwei ba ka KSU kadei ka seng lehnoh ula ong “Ngim dei ki lehnoh ngim dei ki sengkieng atiar hynrei ngi long ki lehnoh halor ka sur ki nongrim ka jingshisha kiba don ïa ka mynsiem ïaleh ka bym tieng bym smiej bad ki bym ju pyndem lano lano ruh bad ka atiar ba ngi kieng kadei la snam bad ka jingim kaba tang shisien”.

Ha kaba ïadei bad ka jingdawa ban pyntreikam ïaka ILP hapoh ka Jylla ula ong wat hapdeng kane ka jinglong jingman jong kane ka pyrthei na kadaw ka khlam COVID 19 ka KSU kan ïai pyrshang ban bteng ïaka jingïakhih ba jai jai nangne shakhmat ter ter tad haduh bala urlong ka jingdawa ILP.

Ula pynbna ba ka jingïakhih halor ki mat jingdawa khamtam ban pyntreikam ïaka ILP hapoh ka Jylla bad ban pynrung ïaka ktien Khasi haka khyrnit kaba phra jong ka riti synshar ka ri bad ka jingpynbeit ïa u pud u sam hapdeng ka Jylla Meghalaya bad Assam kan ïai bteng ha man ki District bad ha East Jaiñtia Hills kan long haka 9 tarik ha Khliehriat bad ha West Jaiñtia Hills kan long haka 16 tarik mynta u bnai.

Utei u nongïalam ula kyntu ïaki dkhot ba thymmai jong ka KSU Khliehriat ba kin shim ïaka lyngkor kum ki nongïalam ban bah na ka bynta ban ïada ïaka ri bad ka jaitbynriew bad ki dei ruh ban pynkhreh la ka long ha kano kano ka bynta jong ka jingïaleh bad khatduh ula kyntu ba kim dei ban klet ïaki saw tylli ki mat treikam jong ka seng kita ki long ka jingsngewrit, jingkitkhlieh, ka jingtreihok bad ka jinglenlade.

Ha katei ka sngi la don 137 ngut ki samla kiba shah pynbam smai haka jingïalang la pynïaid da u Steamly Ñiangti President KSU Khliehriat.

Nalor u President ka KSU, la ïoh ruh ki kyntien pdiang burom na u C Suja General Secretary KSU Khliehriat, na u Leningard Tariang Orgainising Secretary KSU JHDU, na u Jesper Bareh Secretary Synjuk Waheh Shnong East Jaintia Hills, u Sonstar Nongkhlaw Assistant Finance Secretary KSU sengkmie bad na u SS Ryngkhlem President Synjuk Waheh Shnong East Jaintia Hills.