Yn bteng ka jingïakhih ki nongshet ja Mid Day Meal

Syllad | The Rising MeghalayaSeptember 13, 2019

JOWAI: Ka synjuk ki nongshet ja sngi jong ki khynnah skul-ka All Jaintia Mid-Day Meal Workers Union, Jowai (AJMMWU) kaba hap hapoh ka shatri jong ka All Jaiñtia Muster Roll Workers and Labour Union, Jowai (AJMRWLU) kala rai ban bteng ban pynlong ïaka jingiakhih paidbah ban pynbor ïa ka sorkar Jylla ban pynurlong ïaka jingdawa jong ki, kata ban  kyntiew ïaka honorarium na ka T.1000 sha ka T.5000 shibnai bad ka jingsiew ka dei ban long baroh 12 bnai haka shi snem.

Haka sngi Thohdieng da ki hajar ki nongshet ja sngi jong ki khynnah skul kila mih sha surok ryngkat ki jingthoh placard ban ïaid paidbah ba jai jai hapdeng u slap ban dawa na ka sorkar ban pynioh ïaka jingdawa ka jong ki.

Kane ka jingiaid paidbah kaba jai jai kala sdang naduh na Mihmyntdu bad iaid lyngba ka surok bah Ladthadlaboh, Iawmusiang, Chutwakhu, Iongpiah bad la pynkut ha madan ialehkai ka dong Tpep Pale.

U President jong ka All Jaiñtia Muster Roll Workers & Labour Union, u KL Pariat ula ong ba ka kane ka synjuk kala dep ai ka dorkhat ha u Myntri Rangbah ka Jylla naduh u bnai Jylliew ban dawa ban kyntiew ïaka tulop (honorarium) bad ban siew tulop 12 bnai haka dor T.5000 naka T.1000.

Kila dawa ruh na ka sorkar ban ai shuti haba pang ba shitom bad kha khun namar bun hi ki nongshet ja ki dei ki longkmie.

Ula ong ba haka jingiakren bad u Myntri Rangbah ka Jylla ula kular ban shimkhia ban pynurlong ïaki jingdawa ki nongshet ja sngi, hynrei naduh u bnai Jylliew haduh mynta ym don kino kino ki dak ki shin ban pynïoh iaka jingdawa jong ki nongshet ja sngi wat hadien ba ka synjuk kala pynkynmaw ïa u Myntri Rangbah halor kane ka jingdawa.

“Ka tulop ne ka honorarium kaba ïoh ki nongshet ja sngi ka shongdor T.30 shisngi, katba ka rukom trei jong kalong naduh ka por 8 baje mynstep haduh ba wai ka skul bad kane ka kam kam dei shuh ka kam trei shipor namar naduh mynstep ki hap ban pynkhreh ka bam ka dih bad hadien bala dep bam ki khynnah kin hap ruh ban sait ban khlein ïaki tiar ki tar.” La ong u Ma Pariat.

Ula ong shuh shuh ba dei halor kane ka nongrim kila leit ban dawa na u Myntri Rangbah ban kyntiew iaka honorarium jong ki sha ka T.5000 bad ban ai ruh iaki kiwei kiwei ki jingmyntoi da kaba ailad iaki nongshet ja sngi ban pynrung kyrteng haka Meghalaya Building & Others Constructions Welfare Board lane ban pynrung ha ki Health, Social and Pension scheme kiba peit da ka sorkar, khnang ba kine ki nongshet ja sngi kin ïoh myntoi kumba ïohlem kiwei kiwei kiba trei bylla.

Kane ka synjuk hadien ka jingiaid paidbah haka sngi Thohdieng haka jingialang kaba lyngkot kala shim iaka rai da kawei ka sur ban bteng ïaka jingiakhih bad iaka jingiakhih yn pynbna hadien ba kila ïoh ban shong pyrkhat na baroh ki tnad jong ka  AJMRWLU na kylleng ka Rilum Jaiñtia.